Ўзбекистон қай тарзда Таиландни таслим этди? Кейинги рақиб Қатар

Бугун нимчорак финалдан ўрин олган Ўзбекистон - Таиланд баҳси бўлиб ўтди. Учрашувдан аввал ҳамюртларимизнинг устунлиги қайд этилганди. Амалда ҳам терма жамоамиз буни исботлади.

18-дақиқада Остон Ўрунов чап қанотдан рақибларини алдаб ўтиб, Машариповга пас берди, у эса дарҳол Остоннинг ўзига тўпни оширди. Фақатгина Ўрунов дарвозабоннинг олдида тўпни тўхтатишда хатога йўл қўйди. Қулай вазият қўлдан бой берилди. 

Кейинги ҳужумнинг ўзидаёқ Остонда яна бир вазият юзага келди. Якуний зарбага аниқлик етишмади.

22-дақиқада Жалолиддин Машарипов шериклари олиб қўйган тўпни жарима майдони яқинидан тепди. Узоқ паски бурчакни нишонга олган Машарипов тўғри қарор қабул қилганди. Фақатгина дарвозабон қийинчилик билан хавфни бартараф қилди.

Тайм ўртасида Остон жарима майдони ичида бир айланиб олиб зарба берди. Посбон ишончли ўйнади.

Учрашувнинг учдан бир қисми ўтиб бораётганда Ҳолматовда имконият юзага келди. Остон бошлаб берган ҳужумни якунлашга уринган Диёр тепган тўп йўл-йўлакай рақиб ҳимоячисига тегиб дарвозабонга бориб туршди.

37-дақиқада кетма-кет уринишлар самара берди. Диёр Ҳолматов ўнг қанотда очиқ турган Азизбек Турғунбоевга ажойиб узатмани амалга оширди. Азизбек эса бир уринишда ҳам тўпни тўхтатди, ҳам ҳимоячини алдиб ўтди. Кейин дарҳол олдинга чиқмоқчи бўлган посбонни ожиз қолдирди. Супер гол. ҳисоб очилди.

Биринчи бўлим охирида Машарипов, Файзуллаев, Сайфиев комбинация ташкил этди. Аммо, лекин, бироқ…

Танаффусдан сўнг ҳам вакилларимиз ҳужумкорликка эътибор қаратди. Бугун гол уришни бошқалардан кўра кўпро хоҳлаётгани кўринган Остонда яна имконият бўлди. Аммо аниқлик етишмади.

59-дақиқада Таиланд ҳам биринчи аниқ зарбасини голга айлантирди. Майдон марказидан бошланган ҳужумда ярим ҳимоячиларимиз тўсқинлик қила олмади. Натижада жуда чиройли ташкил этилган комбинацияни таиландликлар голга айлантирди. Зарба узоқ масофадан берилгани эътиборга молик. Шу пайт таянч ярим ҳимоячиларимиз қаерда қолди? деган сўроқ сизни ҳам ўйлантирган бўлса ажаб эмас.

65-дақиқада Жалолиддин Машарипов чиройли тарзда Аббосбек Файзуллаевга пас берди. Файзуллаев эса олис пастки бурчакни аниқ нишонга олиб, рақибнинг голига тезкор жавоб берди.

Голдан сўнг Остон Ўрунов ўрнига Ҳожимат Эркинов майдонга тушди. Эркинов дастлаб ҳужумда, кейин эса қанотда ҳаракат қилди.

Учрашув охирларига яқин Жамшид Искандеров Машариповни, Зафармурод Абдураҳматов Турғунбоевни, Жамшид Болтабоев Файзуллаевни алмаштирди.

Қолган дақиқаларда жамоалар ҳар қанча ҳаракат қилмасин, ҳисоб ўзгармади. Ўзбекистон миллий терма жамоаси қийин ғалаба эвазига чорак финалга йўл олди. Кейинги босқичда Қатар билан ўйнаймиз. Учрашув 3 февраль куни бўлиб ўтади.