Ўзбекистон Суперлигасининг энг қиммат ўйинчиси ким?
Трансферларга ихтисослашган transfermarkt.world портали Ўзбекистон Суперлигасида тўп тепаётган футболчиларнинг трансфер нархлари бўйича маълумотларни янгилади.
Жорий мавсумда Ўзбекистон чемпионати юқори дивизионида 14 та жамоада жами 360 нафар футболчи мусобақа қайдномасидан ўтказилган. Улардан 18,6 фоизи, яъни 67 нафари хориж мамлакатларидан келган чарм тўп усталари ҳисобланади.
Суперлигамизда жами 23 мамлакат – Сербиядан ўн уч, Грузиядан тўққиз, Черногориядан етти, Россия ва Тожикистондан бештадан, Хорватия ва Беларусдан учтадан, Қирғизистон, Босния ва Герцеговина, Украина, Шимолий Македония, Бразилия, Гана, Эрондан иккитадан, Испания, Либерия, Япония, Руминия, Латвия, Молдова, Сурия ҳамда Нигериядан бир нафардан футболчи иштирок этмоқда.
Чемпионатимизнинг энг қимматбаҳо ўйинчиси – “Навбаҳор” ярим ҳимоячиси Одилжон Ҳамробеков ҳисобланади. 28 ёшли футболчи 1,2 миллион еврога баҳоланмоқда.
Кучли учликдан жой олган “Насаф” вакиллари – Шерзод Насруллаев ва Акмал Мозговойнинг нархи кўтарилиб, бир миллион еврога етди.
Чемпионатимиздаги тўртинчи “миллионер” олмалиқликлар шарафини ҳимоя қилаётган Хуршид Ғиёсов ҳисобланади. Қолган ҳеч бир футболчининг трансфер суммаси бир миллион еврога етмаган.
Шунингдек, нархи энг кўп кўтарилган футболчилар рейтингида македониялик Люпче Дориев қайд этилган. “Сўғдиёна” ўйинчисининг трансфер суммаси 500 мингдан 900 минг еврога ошди.
Ўзбек футболчилари орасида “Андижон” ҳимоячиси Бектемир Абдуманноновнинг нархи бир баравар ошиб, янги рейтингда беш юз минг еврони ташкил қилмоқда.
Трансфер нархи энг кўп пасайган футболчилар “Пахтакор”нинг тажрибали ярим ҳимоячиси Сардор Собирхўжаев ва “Сурхон”нинг либериялик ҳужумчиси Силванус Нимели бўлди. Уларнинг нархи 200 минг еврога арзонлаган.
Фикрлар