Легионерларимизни Европа Чемпионлар лигасидан чиқариб юборишмоқчи

29 июнь, 00:30
0
Футбол

Янги мавсумда Европа Чемпионлар лигасида икки легионеримиз – Шаҳбоз Умаров ва Жасурбек Яхшибоев иштирок этиши кутилмоқда.

Легионерларимиз ўйнаётган “Ордабаси” клуби ўтган йили Қозоғистон Премьер-лигаси ғолиблигига сазовор бўлди. Ўз тарихида илк бор мамлакат чемпионлигини қўлга киритган чимкентликлар Европанинг энг нуфузли мусобақасидаги дебютига тайёргарлик кўрмоқда.

Таъкидлаш жоизки, етмиш йилдан бери ташкил этиб келинаётган Европа қитъасининг энг нуфузли мусобақаси – Чемпионлар лигаси (аввалги Чемпионлар кубоги) 2024-2025 йилги мавсумдан бошлаб, янгича форматда ўтказилади.

Дастлабки учта саралаш босқичи ва плей-оффдан муваффақиятли ўтган жамоалар Чемпионлар лигасининг умумий босқичига йўлланма олади. Айнан мана шу умумий босқич аввалги форматдаги гуруҳ босқичи ўрнини эгаллади. Бу гал ушбу раунд иштирокчилари сони тўрттага кўпайтирилиб, жами 36 та жамоани ташкил қилади.

Янги мавсумда УЕФАга аъзо 55 та мамлакатдан 53 тасидан футбол жамоалари иштирок этади. Бу йил ҳам мусобақада Лихтенштейн ва Россия вакиллари йўқ.

Қуръа натижасига кўра, “кўҳна қитъа”нинг янгича форматдаги янги мавсумида “Ордабаси” тарихий илк учрашувини Молдованинг “Петрокуб” жамоасига қарши ўтказади. Дастлабки босқичнинг биринчи ўйини 10 июль куни Қозоғистонда бўлади.

Бу беллашувни хорватиялик ҳакамлар бригадаси бошқаради. Бош ҳакам вазифасини Патрик Коларич бажаради. Унга қанотларда Лука Паич ва Иван Старчевич ёрдам беради. Захира ҳаками Дарио Бель бўлади.

“Петрокуб” бош мураббийи Андрей Мартин қозоқ клуби билан бўлажак рақобат ҳақида фикр билдириб, рақибларини мусобақадан чиқариб юбормоқчи эканини таъкидлади.

- Рақиб кучли эканини айтишим лозим. Лекин биз саралаш босқичида улардан ўтамиз. Ягона муаммо Қозоғистонга етиб олиш. Бу жуда олис йўл, у шаҳарга тўғридан тўғри рейс топиб бўлмаса ҳам керак.

Рақиб жамоа жуда тажрибали, асосан, Қозоғистон терма жамоасида ўйнайдиган 30 ёшдан катта бўлган ўйинчилардан таркиб топган, - деди Андрей Мартин.

“Ордабаси” футболчилари орасида Жасурбек Яхшибоев Европа Чемпионлар лигаси гуруҳ босқичида иштирок этиш тажрибасига эга. Легионеримиз уч йил муқаддам Молдованинг “Шериф” жамоаси сафида қитъанинг энг нуфузли мусобақасида қатнашган. Ўшанда Жасурбек “Сантьяго Бернабеу” аренасида мадридлик мухлислар кўз ўнгида “Реал” дарвозабони Тибо Куртуага гол уриб, ўз номини тарихга муҳрлаган эди.

Бундан ташқари, Яхшибоев Молдова чемпионати доирасида “Петрокуб”га қарши икки маротаба майдонга тушиб, биттадан гол ва ассист муаллифи бўлган.

27 ёшли ҳужумкор футболчимиз Европа Чемпионлар лигасининг саралаш раундларидан муваффақиятли ўтиб, умумий босқичда иштирок этишни истаётганини таъкидлади.