Ўзбекистон терма жамоаси аввал ҳам КОНКАКАФ вакили билан ўйнаганми?

Хабарингиз бор, Ўзбекистон терма жамоаси кеча Жанубий Кореяга учиб кетди. Сречко Катанец шогирдлари ушбу йиғин доирасида иккита ҳалқаро ўртоқлик учрашувида майдонга тушади. 27 сентябрь куни ҳамюртларимизга КОНКАКАФ вакили Коста-Рика термаси рақиблик қилади.

Ўз-ўзидан савол туғилиши мумкин. Термамиз аввал ҳам ушбу қитъа вакиллари билан ўйнаганми? Албатта. 2016 йил Самвел Бабаян бошчилигидаги "оқ бўрилар" "Thermenstadion" ўйингоҳида Канадага қарши майдонга тушиб, 1:2 ҳисобида мағлубиятга учраганди. Баҳснинг 20-дақиқасида "Ньюкасл" собиқ футболчиси Давид Эдгар ҳисобни очганди. 61-дақиқада Сергеевнинг узатмасидан кейин Элдор Шомуродов гол уриб, мувозанатни тиклаган. Учрашув якунига яқин ҳимоячимиз Акром Комилов соф ҳужумчилардек ҳаракат қилиб, ўз дарвозамизни ишғол қилиб қўйганди.

Терма жамоамизнинг Канадага қарши асосий таркиби қўйидагича кўриниш олган:

Ушбу таркибдан ҳозирда 3 нафар футболчи: Элдор Шомуродов, Игорь Сергеев ва Отабек Шукуров терма жамоадаги фаолиятини давом эттирмоқда. Сервер Жепаров ва Александр Гейнрих бутсаларини михга илган. Қолганлар учун эса ҳозирча терма жамоа эшиклари ёпиқ.

Жалолиддин Қобилжонов