Ўзбекистон терма жамоаси Осиё ўйинларида легионерларсиз иштирок этиши мумкин, сабаби...

Айни дамда Индонезияда бўлиб ўтадиган навбатдаги Осиё ўйинларига тайёргарлик кўраётган Равшан Ҳайдаров бошчилигидаги Ўзбекистон U-23 терма жамоаси Туркияда ўқув-йиғин машғулотлари ўтказиб қайтди. Терма жамоа устози Равшан Ҳайдаров SPORTS.uz мухбири билан суҳбатда Осиё ўйинларига легионер мақомидаги етакчи футболчиларни жалб эта олмаслик хавфи борлиги ҳақида айтиб ўтди.

"Ҳозирги таркибимизга яна айрим футболчиларни қўшиш режамизда бор. Қўшилса ҳам асосан легионерларнинг ҳисобига янада кучайишимиз мумкин. Бизнинг кенгайтирилган таркибимизда яна бошқа кучайтирадиган ўйинчиларимиз бор. Лекин уларнинг аксарияти ҳозирда легионер мақомига эга бўлишган. Айни пайтда уларнинг клублари билан музокаралар олиб боряпмиз. Достон Ҳамдамов, Отабек Шукуров, Элдор Шомуродов сингари футболчиларнинг клублари билан бир тўхтамга кела олсак, ажойиб иш бўларди. Аммо улар аниқ келишади деб бўлмайди. Шунга қарамай, биз ўзимиз томонимиздан барча ишларни амалга оширишга ҳаракат қиляпмиз. Уларнинг клубларига хатлар билан мурожаат қиляпмиз. Аммо шуни унутмаслик керакки, Осиё ўйинлари мусобақаси ФИФА кунларидан ўрин олмаган. Шу боис хориж жамоаларининг ўз футболчиларини терма жамоаларга қўйиб юбормасликка ҳаққи бор", - дейди тажрибали мутахассис.

Равшан Ҳайдаров билан уюштирилган тўлиқ интервьюни тез орада сайтимиз орқали ўқишингиз мумкин.