O‘zbekiston U-21 terma jamoasi Osiyo kubogiga qanday tayyorlanmoqda? Bosh murabbiy javob berdi

O‘zbekiston U-21 terma jamoasi bosh murabbiyi Ravshan Haydarov Osiyo kubogi oldidan matbuot anjumanida ishtirok etdi.

Tayyorgarlik haqida

"7 dekabr sanasidan boshlab Toshkentda Osiyo kubogi oldidan dastlabki o‘quv-mashg‘ulot yig‘inini olib bordik. 28 nafar futbolchini jalb etgan holda mashg‘ulotlar o‘tkazdik. Futbolchilar turli mavsum o‘tkazishdi, ayrimlari yig‘inga kechroq etib keldi. Umuman olganda, barchaning imkoniyatlarini ko‘rib, sinovdan o‘tkazib bordik.

Yig‘inning keyingi qismi Qatarda davom ettiriladi. U erda Iordaniya va Qatar U-23 terma jamoalariga qarshi so‘nggi nazorat o‘yinlarini o‘tkazamiz. Shundan so‘ng Osiyo kubogiga yo‘l olamiz."

Olimpiya yoshidagi futbolchilar haqida

"Murabbiylar kengashi, shuningdek, avvalgi tajribalarimizdan kelib chiqqan holda musobaqada 2005, 2006 yillarda tug‘ilgan va undan kichik futbolchilar (olimpiya yoshi) bilan ishtirok etishni maqsad qilganmiz. Bu sinovdan o‘tgan tajriba, avvalgi turnirlarda ham shu tizimda ishtirok etganmiz.

2003 va 2004 yillarda tug‘ilgan futbolchilar hozirda klublarida o‘z o‘rnini topishgan, Osiyo kubogida chempion bo‘lishgan, Jahon chempionatida ishtirok etishgan. Qolaversa, ular milliy terma jamoaga ham jalb etilmoqda. Shu sababli, U-23 musobaqasiga ikki yosh kichik futbolchilardan iborat jamoa bilan boramiz."

Oldinda turgan vazifa haqida

"Albatta, har doim o‘z oldimizga katta maqsad qo‘yamiz. Chunki ushbu musobaqada reytingimiz ancha baland. Chempion bo‘lganmiz va so‘nggi ikki musobaqada finalga chiqqanmiz. Shu sababli ham o‘z oldimizga yuqori maqsad qo‘yib, musobaqaga yo‘l olyapmiz".