Ўзбекистон U17 бош мураббийи: Саудия Арабистонига қарши ўйинга бошқача ёндашув билан тайёргарлик кўрмоқдамиз

Ўзбекистон ўсмирлар терма жамоаси бош мураббийи Жамолиддин Раҳматуллаев ва жамоа футболчиси Шерзод Абдулбориев Саудия Арабистонига қарши ўйин олдидан матбуот анжуманида иштирок этишди.

Жамолиддин Раҳматуллаев

Эртанги ўйин ҳақида:

Авваламбор ушбу босқичга етиб келган барча жамоаларни табриклайман. Чорак финал ўйинлари барча учун муҳим ҳисобланади. Ушбу ўйин Жаҳон чемпионати йўлланмасини ҳам тақдим этади. Шу сабабли биз мазкур муҳим ўйинда ғалаба учун ҳаракат қиламиз.

Футболчиларга мотивация бериш ҳақида:

Биз ушбу турнирга жуда катта мотивация билан келганмиз. Йигитларда иштиёқ жуда юқори. Ўйиндан ўйинга жамоа ҳар томонлама ривожланиб бормоқда, эртага иштиёққа тўлиб майдонга тушамиз. Бу футболчилар бизнинг келажагимиз. Айтганимдек, уларнинг ўсишлари, фаолиятларида йирик турнирлар катта аҳамиятга эга.

Гуруҳ босқичи ва чорак финал ўйинлари:

Гуруҳ босқичи учрашувлари якунланди, энди эса бор эʻтиборимизни эртанги баҳсга қаратганмиз. Саудия Арабистонига қарши ўйинга бошқача ёндашув билан тайёргарлик кўрмоқдамиз. Масъулият ва совуққонлик билан керакли натижа учун майдонга тушамиз.

Шерзод Абдулбориев

Эртанги ўйин ҳақида:

Эртага муҳим учрашувда майдонга тушамиз. Ўзимизга бўлган ишонч билан ғалабага эришишни мақсад қилганмиз. Бу борада тайёргарлик ҳам олиб боряпмиз. Рақибимизни ўрганишда давом этяпмиз.