Ўзбекистон ва Россия тўқнашувида олтита гол бўлди

Россия-U21 терма жамоаси ўқув-машғулот йиғинини Бухорода ўтказмоқда. Россияликлар йиғин давомида ўзбекистонлик тенгқурлари билан иккита ўртоқлик учрашуви ўтказиши белгиланган.

Россия ёшлар терма жамоаси мураббийлар штаби юртимиздаги йиғинга 23 нафар истеъдодли футболчиларни жалб қилган.

Ўзбекистон футбол федерацияси ҳам бу ўртоқлик учрашувига жиддий эътибор қаратди. Мамлакатимиз ёшлар терма жамоаси мураббий Фарҳод Нишонов  россиялик журналистлар билан суҳбатда терма жамоа Бухорода ташкил этиладиган иккита ўртоқлик ўйини учун Словакиядаги халқаро турнирда қатнашмасликка қарор қилинганини таъкидлади.

Ўзбекистон ва Россия ёшлар терма жамоалари “Бухоро Арена” стадионида саф тортди. Ўртоқлик мақомидаги  учрашувлар голларга бой бўлди.

Беллашувни Рустам Лутфуллин бошчилигидаги ҳакамлар бригадаси бошқарди.

Ўйин кескин ва муросасиз курашлар остида ўтди ва стадионга келган мухлислар шу куни жами олтита голга гувоҳ бўлди.

Ҳисобни очиш меҳмонларга насиб қилди. 9-дақиқада 17 ёшли Кирилл Глебов мезбонлар дарвозасини ишғол қилиб, россияликларни олдинга олиб чиқди.

Биринчи бўлим ўрталарида Россия ёшлари ўз жарима майдончаси ичида қоидани бузди. Белгиланган пеналтини Муҳаммадали Ўринбоев аниқ амалга ошириб, вазиятни тенглаштирди.

Иккинчи бўлим янада қизиқарли кечди. Тайм бошланиши билан Матвей Кисляк жамоадошни Михаил Рядно узатган тўпни дарвозага аниқ жойлади.

Ўзбекистон ёшлар терма жамоаси иккинчи бўлим ўрталарида ўйинда устунликка эришди. Истеъдодли футболчимиз Абдуғофур Ҳайдаров 62-дақиқада ҳисобни тенглаштирадиган гол муаллифи бўлди. Орадан уч дақиқа ўтиб, Нурлан Иброҳимовни аниқ пас билан қулай позицияга чиқарди.

Уч дақиқа ичида иккита тўп киритган ёшларимиз ҳисобда олдинга чиқиб олди.

Ўйин охирига бориб, россияликлар мағлубиятдан қутилиб қолди. Илья Ишков 82-дақиқада жамоасининг учинчи голини киритди.

Мухлисларга ёқадиган ўйин 3:3 ҳисобида дуранг натижа билан якунланди.

Учрашувдан кейин Россия ёшлар терма жамоаси бош мураббийи Иван Шабаров ўз фикрлари билан ўртоқлашди.

- Ўзбекистон билан дуранг – биз истаган натижа эмас. Стандарт вазиятлар бизнинг нозик нуқтамиз экани билиниб қолди, - деди Иван Шабаров.  

Энди ҳар икки терма жамоа яна бир марта ўзаро куч синашади. Иккинчи ўртоқлик ўйини 11 сентябрга белгиланган.