Ўзбекистон ва Уругвай терма жамоалари ўртасидаги учрашув ўтказилмаслиги мумкин эди

Ўзбекистон миллий терма жамоаси эртага Уругвайга қарши ўртоқлик учрашувида майдонга тушади. Аммо айрим сабаблар туфайли ушбу баҳс бекор бўлиши ҳам мумкин эди. Бу ҳақда футбол шарҳловчиси Хайрулла Ҳамидов ўзининг "Telegram" каналида маълум қилди.

"Ўзбекистон терма жамоаси Малакка шаҳрига келиб тушган, Уругвай эса Куала Лумпурда яшаяпти. Кеча куни билан майдон ташқарисида “жанг” бўлди: ўйинни жанубий америкаликлар пойтахтга кўчиришни талаб қилишди (Малаккадаги стадион ёмонлигидан), бизникилар эса, Куала Лумпурда ўтса 180 километрлик масофада бўзчининг ипидек сарсон бўлмаслик учун ташкилотчиларга шарт қўйишди: бутунлай терма жамоани пойтахтга ўтказиш ё келишилган жойида қолиш.

Охири иш нима билан тугади, дейсиз? Ўзбекистонни тайёр жойидан олиб кела олишмади, уругвайликларни кўндиришди ва ўйин Малаккада ўтадиган бўлди.

Биз айни паллада Куала Лумпурдаги отелдамиз. Аслида биз учун ҳам ўйин Уругвай истаган жойда ўтса қулай эди. Лекин терма жамоамизнинг қатъий қарори олдида Малаккага бориб келишга розимиз. Чунки мундиал иштирокчиси бўлган терма жамоа ўйиндан олдинги “ўйинлар”ни ҳам енгишга ўрганиши керак. Шундагина тўқсон дақиқалик ўйинда бу юрт либосидаги футболчилар билан жиддий ҳисоблашадилар.

Респект, терма жамоамиз масъуллари, респект, Каннаваро!", — деб ёзди журналист.

 Маълумот учун, ушбу беллашув эртага Тошкент вақти билан 17:45'да старт олади.