Ўзбекистонга қарши иккита учрашувда ўйнаган машҳур футболчи балкондан пастга қулади

Саудия Арабистонининг таниқли футболчиси Фаҳад Ал-Муваллад ҳаётида кўнгилсиз воқеа юз берди. Бир неча манбаларнинг ёзишича, у иккинчи қаватдаги балкондан пастга қулаб тушган.

Манбаларга кўра, воқеа футболчининг Дубайдаги шахсий уйида содир бўлган.

Фаҳад ўз вақтида шифохонага етказилди ва айни пайтда интенсив терапия бўлимида даъволанмоқда.

Ал-Муваллад Саудия Арабистонининг “Аш-Шабаб” жамоаси ўйинчиси ҳисобланади. Бу клуб сафида 2022 йилдан бери тўп тепяпти. Фаолиятининг катта қисмини “Ал-Иттиҳод” клубида ўтказган. Шунингдек, 2018 йили Испания чемпионати вакили “Леванте”да ҳам ўйнаган.

Фаҳад Ал-Муваллад Саудия терма жамоасида 74 та учрашувда рақиблар дарвозасини 17 маротаба ишғол қилган.

Саудиялик ҳужумкор футболчи Ўзбекистонга қарши ўтказилган учрашувлар иштирокчиси ҳисобланади. У ҳамюртларимиз билан 2015 ва 2021 йилги баҳсларда майдонга тушиб, битта голли пас ҳам узатган.