Ўзбекистонлик боксчи мағлуб бўлмаган Африка вакилига имкон қолдирмади!

Кеча, Хитойнинг Фошан шаҳрида профессионал бокс кечаси ташкил этилди. Мазкур бокс оқшомида ўзбекистонлик Камрон Эшматов ҳам рингга кўтарилди. Жавлон Эшматов ҳамда Сардор Раззақов шогирди бўлган юртдошимиз угандалик мағлубият билмай келаётган Давид Ссемужжуга (5-0) қарши баҳс юритди. 8 раундлик қилиб белгиланган ушбу қарама-қаршилик тўлиқ давом этди. Якунда, раундлар мобайнида яққол устунлик қилган ҳамюртимиз ҳақли тарзда ғалаба қозонди ва рақибига 5 ғалабали сериядан сўнг, илк мағлубиятни тақдим этди. Ўзи эса кетма-кет 8-ғалабасига эришди.
Эътиборли жиҳати, юртдошимиз 7 та жангини енгил вазн (61,2 кг) тоифасида ўтказганди. Бу сафар эса ярим ўрта вазн (66,6 кг) тоифасида рингга кўтарилди.