Ўзбекистонлик легионерлардан қониқмаган ва Гильерменинг "Локомотив"га келишига сабабчи бўлган Ҳаким Фузайлов sports.uz учун яна нималар деди?

Ўзбек мухисларига яхши таниш бўлган тожикистонлик мутахассис Ҳаким Фузайлов айни пайтда ўз юртида “Хўжанд” клубини бошқармоқда ва куни кеча якунига етган биринчиликда унинг жамоаси кумуш медални қўлга киритди. Ўз вақтида у бир қатор клубларимизни бошқарган.

Бундан ташқари, Россиянинг “Локомотив” ҳамда “Терек” клубларида ҳам ишлаган. Ушбу мутахассис sports.uz мухбирининг бир қатор саволларига жавоб бериш учун вақт ажратди.

-  Ҳаким Қаюмович, бошқарувингиздаги “Хўжанд” клуби Тожикистон чемпионатида иккинчи ўринни банд этди. Кутилганидек, “Истиқлол” яна мамлакат чемпиони бўлди. Айтинг-чи, тожик биринчилигини зерикарли, деб ҳисоблаш мумкинми?

-  Ҳа, чемпионат коронавирус эпидемияси туфайли жуда мураккаб кечди. Гапингизда жон бор, чемпионатимиз савиясини ўта юқори, дейиш амримаҳол.

-  Қўл остингизда ўзбек футболчилари – Маъмур Икромов, Сирож Ҳамроев ва Санжар Рихсибоев тўп сурди. Аммо, эшитишимча, улар сизнинг ишончингизни қозона олмаганлар. Шу тўғрими?

-  Умуман олганда, йигитларингиз чакки эмас. Бироқ легионер мақомидаги футболчи маҳаллий ижрочилардан маҳорат бобида бир бош баланд бўлиши керак. Бахтга қарши улар шундай эканликларини кўрсата олмадилар.

-  Агар сир бўлмаса айтинг-чи, ихтиёрингиздаги жамоада ўзбекистонлик қайси ўйинчиларни кўришни хоҳлаган бўлардингиз?

-  Агар “Хўжанд”да қоладиган бўлсам, албатта, таркибни кучайтириш учун легионерларни таклиф қиламан. Хусусан, Ўзбекистондан ҳам ўйинчиларни олиб келишга ҳаракат қилишим аниқ. Аммо таклиф қиладиган легионерларимиз тожик футболчиларидан ҳар томонлама устун бўлиши даркор.

-  Ўз вақтида Тожикистон миллий терма жамоасини бошқаргансиз. Эндиликда эса бу ролни ўзбекистонлик мутахассис Усмон Тошев ижро этмоқда. Сизнингча, Тошев қўл остида Тожикистон терма жамоаси қандай натижаларни қайд эта олиши мумкин?

-  Ҳозир аниқ бир гап айтиш мушкул. Чунки терма жамоа аъзолари камдан-кам ҳолларда тўпланишяпти ва бунинг сабабини ўзингиз ҳам яхши биласиз. Шунингдек, терма жамоамиз жуда кам ўйин ўтказди. Шу сабабдан ҳам Тошевга осон бўлмаслиги аниқ.

-  Сиз мураббийлик фаолиятингиз давомида қачонлардир ўзбек клублари – “Бухоро”, “Динамо”, “Андижон” ва “Локомотив”ни бошқаргансиз. Ўша жамоаларда олиб борган ишингизга қандай баҳо берган бўлардингиз? Қайси  клубларда сизга ишлаш ёққан ва қайсиларида эса аксинча?..

-  Ўзбекистонда ишлаб юрган кезларимдаги фаолиятимни анча муваффақиятли чиққан, дейишим мумкин. Ҳар бир клубда бир-биридан мутлақо фарқ қиладиган турли вазифаларни ва мақсадларни бажарганман. Қаерда ишламайин, менга ҳаммасини тўғри амалга оширишим учун етарли бўлган барча шарт-шароитларни муҳайё қилиб берганларини алоҳида таъкидламоғим жоиз. Шу боисдан ҳам ўзим ишлаган клубларни, жумладан ўзбек футболи қандай ривожланиб бораётганини кузатиб келяпман. Юртингизда футбол анча тараққий этаётгани мени қувонтиради.

-  У ҳолда четдан кузатаётган мутахассис сифатида ўзбек футболининг бугунги савиясини қандай баҳолайсиз?

-  Назаримда, ўзбек футболи бугунги кунда тўғри йўналишдан кетмоқда. Буни шундан ҳам билиб олиш мумкинки, ўзбек футболчилари миллий биринчиликда ҳамда четга чиқиб ўйнаётганлар футболингиз тараққиёти тўғри йўлдан кетаётганини исботлаб беришмоқда. Ўйлайманки, яқин йилларда Ўзбекистон терма жамоаси ўзи учун армон бўлиб келаётган жаҳон чемпионатининг финал босқичи йўлланмасини албатта қўлга киритади. Ҳар қандай ҳолатда ҳам мен сизларга шуни тилаб қоламан.

-  Шунингдек, сиз Москванинг “Локомотив” ҳамда Грознийнинг “Терек” клубларида селекционер мураббий сифатида ҳам фаолият юритгансиз. Шу вақт давомида қайси футболчиларни кашф эта олгансиз?

-   Орадан анча йиллар ўтди. Ҳозир номдор бўлганлардан фақат дарвозабон Гильерме билан Майконни эслай олишим мумкин. Улардан ташқари яна бир қатор футболчиларни ўзим ишлаган клубларга жалб этишда қатнашганман. Орадан анча вақт ўтиб кетгани боис ҳаммасининг исм-шарифларини бирма-бир санаб ўта олмайман.

-  Айтинг-чи, шу пайтгача сизга ўзбек клубларидан яна иш таклиф қилишганми?

-  Иш таклифи билан чиққан клублар бўлган, лекин музокаралар аввал бошиданоқ ниҳоясига етгани боис ўша жамоаларни номма-ном санаб беришни истамаган бўлардим. Бу иккала томон учун ҳам ноқулайлик туғдирмасдан қолмайди.

-  Сизнинг назарингизда ўзбекистонлик мураббийлар орасида энг кучли уч нафар мутахассис ким?

-  Айтишим мумкинки, сизларда яхши савиядаги мураббийлар етарлича топилади. Бошқалар ранжимаслиги учун уларнинг орасидан учтасини ажратиб кўрсатишни истамайман.