O‘zbekistonlik og‘ir atletikachi doping sabab sportdan vaqtincha chetlatildi

Xalqaro og‘ir atletika federatsiyasi – IWF xabariga ko‘ra, o‘zbekistonlik og‘ir atletikachi, jahon chempionati sovrindori Rustam Jangaboevning doping namunasi o‘sish gormoni (hGH) bo‘yicha ijobiy tahlil natijalarini bergan. Bu haqda kun.uz sayti xabar bermoqda.

11 aprel kuni IWF saytida joylashtirilgan xabarda aytilishicha, Jangaboev antidoping qoidalarini buzgani uchun sportdan vaqtincha chetlatildi.

Qayd etilishicha, agar sportchi antidoping qoidalarini buzmagani aniqlansa, unda bu haqdagi tegishli qaror ham e’lon qilinadi. 

IWF ish yuzasidan surishtiruv jarayoni yakunlanguniga qadar qo‘shimcha ma’lumot bermasligi aytiladi.

Ma’lumot uchun: Rustam Jangaboev 1993 yil 25 avgust kuni tug‘ilgan, musobaqalarda 105 kilogrammdan yuqori vazn toifasida qatnashadi. 2018 yilgi jahon chempionati sovrindori, 2017 yil Ashxabodda o‘tkazilgan Osiyo o‘yinlari chempioni, Rio-de-Janeyrodagi yozgi Olimpiya o‘yinlari ishtirokchisi.