Ўзбекистоннинг бўлажак рақиби янги жамоа билан шартнома имзолади

Жаҳон футболида ном қозонган колумбиялик ҳужумкор ярим ҳимоячи Хамес Родригес фаолиятини МЛСда давом эттирадиган бўлди. Тажрибали футболчи “Миннесота Юнайтед” билан шартнома имзолади.

Бу ҳақда клуб расмий сайти хабар тарқатди.

Хамес Родригес Америка клубига эркин агент сифатида қўшилди. Шартнома 2026 йил ёзигача мўлжалланган бўлиб, “Миннесота”да уни йил охиригача узайтириш ҳуқуқи мавжуд.

АҚШга кўчиб ўтишдан олдин Хамес 2025 йил бошидан буён Мексиканинг “Леон” клубида ўйнаган эди. У ерда 34 та учрашувда иштирок этиб, 5 та гол ва 9 та голли узатма муаллифи бўлди.

Футболчи фаолияти давомида Европанинг қатор топ-клубларида, жумладан “Реал”да ҳам тўп сурган.

Хамес Родригес 2026 йилнинг ёзида АҚШда бўладиган жаҳон чемпионатига юқори спорт формада етиб бормоқчи. Эслатиб ўтамиз, Колумбия терма жамоаси мундиалнинг гуруҳ босқичида Ўзбекистон футболчилари билан рақобатлашади.