"Ўзбекистоннинг ўйин амалиёти ва халқаро тажрибаси бойлиги билинди". Терма жамоамизга гол урган қирғизистонлик футболчи билан суҳбат

Қирғизистон терма жамоаси Ўзбекистонга қарши ўйинда кўпчиликда яхши таассурот қолдиргани рост. Улар вакилларимизга етарлича қаршилик кўрсатдилар. Буни дарвозамизга бир эмас, иккита гол ура олганидан ҳам билиш мумкин.

Мухлисларимизга яхши таниш бўлган, “Бунёдкор”нинг собиқ футболчиси ва яқинда Вьетнам чемпионатига кўчиб ўтган ярим ҳимоячи Одил Абдураҳмонов Қирғизистоннинг иккинчи голига муаллифлик қилди ва ўзидан яхши таассурот қолдирди.

Ушбу ўйинчи Sports.uz сайтига интервью берди.

- Аввало, ўйин ҳақидаги фикрларингиз билан ўртоқлашсангиз?

- Ўзбекистон билан қийин учрашув бўлишини олдиндан билардик. Яхши тайёргарлик кўргандик. Баъзи кичик камчиликларимиз бўлди. Барибир Ўзбекистон Осиёда ўз ўрнига эга бўлган жамоа. Ҳеч бўлмаганда дуранг натижа қайд этишни истагандик. Лекин бу – футбол. Ҳаёт давом этади. Халқаро савия ва амалиётни ҳам ўз ўрни бор. Ўзбекистон терма жамоаси бизга қараганда кўпроқ ўйин амалиёти ва халқаро тажрибаси бой бўлганлиги учун бу ҳол учрашувда ҳам сезилди. Худо хоҳласа, кейинги ўйинларда яхши натижа кўрсатишга ҳаракат қиламиз.

- Қирғизистон яхши таассурот қолдирди. Иштиёқ кучли эди. Нима етишмади, деб ўйлайсиз?

- Ҳа, ўйинга бўлган иштиёқ кучли эди. Жамоамиз ёшартириляпти. Боя айтганимдек, барибир халқаро тажриба камлик қилди. Бу ўз сўзини айтди. Шунинг ҳисобига мағлубиятга учрадик, деб ўйлайман. Бу нарсалар вақт ўтиши билан жойига тушади. Қирғизистон терма жамоасининг кўплаб ғалабалари ҳали олдинда, деб ўйлайман.

- Гол уришга эришдингиз. Ўша вазиятда гол бўлишини кутганмидингиз?

- Гол урганим ўз-ўзидан бўлгани йўқ. Ҳамма футболчини ҳам гол ургиси келади. Стандарт вазиятлар устида ишлагандик. Бу борада мураббийларнинг кўрсатмаси бўлган. 2-3 кун мобайнида стандарт вазиятлар билан астойдил шуғулланганмиз. Бу эса ўйинда ўз натижасини берди. Шуни ҳисобига гол урдим.

- Эрон ва Ўзбекистонга қарши ўйнадинглар. Сиз учун қайси бири кучлироқ кўринди?

- Тўғри, гуруҳдаги иккита энг кучли терма жамоалар билан ўйнадик. Қолган термаларни ҳам кучсиз деб бўлмайди. Қатар, КХДР ёки БАА бўладими, барчаси ўзига яраша кучли рақиблар. Биз дастлабки иккита турда етакчиларга қарши ўйнаб анча тажриба орттирдик. Кейинги беллашувларда бундай хатолар бўлмаслигига ва яхши натижалар кўрсатишга ҳаракат қиламиз. Нисбатан Эрон термасини халқаро майдонда кучлироқ эканлигини билдим. Тажрибали ўйинчилар кўп экан. Эронни бироз кучлироқ деб ҳисоблайман.  

- Стадиондаги аншлаг сизларга қўшимча мотивация бердими ёки босим ўтказдими?

- Мухлисларни қўллаб-қувватлаши ҳар доим куч беради. Босим ўтказмайди. Ҳамма вақт ишқибозлар тўла стадионда тўп суриш қизиқарли. Ҳеч қанақа босим бўлади, деб ўйламайман. Аксинча ишқибозлардан куч оламиз. Футболни ҳар доим мухлислар учун ўйнаймиз.

Шуҳратбек Жўраев.