Ўзбекистоннинг ярим финал ўйини мухлисларсиз ўтадими? Бунда ОФК нима йўқотади?

Айни кунларда юртимиз 23 ёшгача футболчилар ўртасидаги Осиё Кубогига мезбонлик қилмоқда. Чорак финаллар якунланиб, ярим финаллар остонасидамиз.

Ўзбекистон олимпия терма жамоаси гуруҳдан кейин ноқулай рақибга дуч келди ва жуда-жуда қийин кечган баҳсда ирода намойиш этиб, кейинги босқичга йўл олди.

Чорак финал биз учун жиддий синовга айланди. Ироқ “ҳар томонлама” бизни синовдан ўтказди. Футболчилар уларнинг ҳийла найрангларига муносиб тарзда, мардонавор жавоб берди.

Воқеалар 12-дақиқадан бошланди. Абдувоҳид Неъматов ўз жарима майдони ичида тўпни тезроқ шерикларига етказиб бермоқчи бўлганида рақиб футболчиси унга тўсқинлик қилди. Унинг провакациясига учган посбон тирсаги билан рақибни уриб юборди. Шунда ВАР катта саҳнага чиқди. Натижада вакилимиз ҳакам томонидан четлатилди.

Шундан сўнг стадион жунбушга келди. Мухлислар эътирозларини ироқ вакилларига тош отиш билан кўрсатишди. Афсуски, майдонга отилган жисмлар ўзбекистонлик фотограф ва хорижлик видеооператорга шикаст етказди.

Ўйин анча вақт тўхтатиб турилди. Футболчилар ишқибозларни тинчлантиришга уринди. Бироз вақт ўтгач, учрашув давом эттирилди. Бир киши кам бўлиб қолганимиз етмаганидек, дарвозамиз томон пенальти белгиланди. Жарима зарбаси голга айланди.

Ундан кейинги вазиятлар барчага маълум, ҳали ҳам ҳамманинг кўз ўнгида. Футболчиларимиз юрт, ватан, байроқ, мураббийи, ота-оналари, мухлислар учун курашди. Ирода намойиш этди. Бир киши кам бўлиб 120 дақиқа жанг қилган жамоа бўлди. Пенальтилар сериясида ҳам характер кўрсатиб, Ироқни майдонда тиз чўктирди!

Шуни ҳам қайд этиш керакки, майдонга тош отган мухлислар ироқликларни анча саросимага солиб қўйгани ҳам бор гап. Бу билан уларнинг бундай ишини оқламоқчи эмасмиз. Аммо мухлислар ўйинда бурилиш ясади. Аслида бурилиш Ироқ томонидан бўлиши керак эди. Одатда мухлислар 12-футболчи футболчи дейилади, лекин шу куни бизга камлик қилган футболчининг ўрнини боса олишди.

Учрашувдан сўнг Абдувоҳид Неъматовнинг нечта ўйинга четлатилиши ва Ўзбекистон U-23 терма жамоаси иштирокидаги ярим финал беллашуви мухлисларсиз ўтказилиши мумкинлиги борасида ваҳимали хабарлар янграй бошлади. Осиё футбол конфедерацияси ҳали бу ҳақда расмий маълумот тарқатмади. Аммо шамол бўлмаса дарахтнинг учи қимирламаслиги рост.

Стадионда рўй берган ҳолатлар шунга қараб кетмоқда. ОФК тез орада бунга аниқлик киритади. Аммо бир қарорга келишдан олдин ОФК мутасаддилари яхшилаб ўйлаши керак. Нега? Чунки ФИФА ҳалол футбол тарафдори. Ироқда эса бунинг акси намоён.

Қолаверса, қитъамизда мухлислик борасида мақтанарли кўрсаткичлар йўқ. Европа ва Жанубий Америка қитъасидаги каби ўйинлар, мусобақалар, турнирлар бошқа давлатларда ўтказилса, стадионларни тўлдирадиган даражада мухлислар келмайди. Шунинг учун ОФК Осиё Кубоги ярим финалини мухлисларсиз ўтказса, қитъада футбол тарғиботи йўлида ортга қадам ташлаган бўлади.

Аслини олганда бунда ОФКнинг ўзи ҳам айбдордек. Чунки мусобақани ўтказиш талабига жавоб берадиган аренани яхшилаб ўрганиши лозим эди, ЎФА ҳам. Бир неча йил аввал “Пахтакор” – “Навбаҳор” баҳсида ҳам шунга ўхшаш ҳолат кузатилганди. Ўшанда маълум бўлганди, “Пахтакор” ўйингоҳида мухлислар трибуналари таъмирталаб ҳолга келгани. Стадионга жавоб берадиганлар, ЎФА бундан хулоса чиқармагани кўриниб турибди.

Энди олимпиячилар иштирокидаги беллашувда мухлисларнинг киритилмаслик хавфи бор. Аммо ОФК бунги юқорида айтганимиздек, ҳар томонлама ўйлаб қарор чиқариши лозим. Четлатиш жуда осон. Аммо мухлисларни ортга қайтариш жуда қийин.

Қитъамизнинг юқори ташкилоти бундай паллада мезбон ЎФА ва стадион маъмуриятига тартибни сақлай олмагани учун жарима қўллаши мумкин. Томошабинларсиз футбол бошқача футбол. Бу ОФК футболи имижига ҳам таъсир қилиши шубҳасиз. Айнан мухлислар тўла ареналарда футбол жозибасини йўқотмайди. Боз устига мезбонлар мухлислари учрашувга қўйилмаса, мусобақа ўтаётганини сезиш жуда қийин. Зеро, мезбонлар чемпионат кайфиятини белгилайди, футбол мухлислар учун ўйналади!

Бекзод ИСАЕВ