Пара таэквондочиларимиз жаҳон чемпионатида муваффақиятли иштирок этишди

Кеча Истанбул мезбонлигида ўтган пара таэквондо бўйича навбатдаги жаҳон чемпионати ўз ниҳоясига етди.

Бундан бироз аввал, "Токио-2020" ёзги Паралимпия ўйинлари чемпиони Гулжаной Наимова аёллар ўртасида +65 кг вазн тоифасида олтин медални қўлга киритди ва дунёда тенгсиз эканини яна бир бор исботлади.

Эслатиб ўтамиз, кеча аёллар ўртасида -47 кг вазн тоифасида Зиёдахон Исоқова ҳамда эркаклар ўртасида -58 кг вазн тоифасида Лутфулло Қодиров бронза медалига сазовор бўлган эди.

Шу тариқа, ушбу нуфузли мусобақада 7 нафар спортчи билан қатнашган Ўзбекистон терма жамоаси якунда 2 та бронза ва 1 та олтин медални қўлга киритган ҳолда умумжамоа ҳисобида 5-ўринни эгаллади. Айтиш керакки, бу галги жаҳон чемпионатида сайёрамизнинг 41 та мамлакатидан 300 га яқин спортчи иштирок этди.