Пато яна Европага қайтмоқчи

Фаолиятини Хитойнинг "Тяньцзинь Цюаньцзянь" клубида давом эттираётган бразилиялик ҳужумчи Алешандре Пато яна Италия А Серияга қайтишни режалаштирмоқда. Бу ҳақда италиялик машҳур журналист Жанлуки Ди Марцио хабар тарқатмоқда.

Унга кўра 29 ёшли футболчи Хитой клуби билан амалдаги шартномани бекор қилиш бўйича келишувга эришган. Шу тариқа у янги жамоасига эркин агент сифатида келиб қўшилади.

Эслатиб ўтамиз, қишки трансферлар даврида унга “Милан”дан ҳам қизиқишлар бўлган эди. У “россонерилар” сафида 2007-2013 йилларда тўп сурган.

Маълумот учун, Пато "Тяньцзинь Цюаньцзянь" сафида 2017 йилдан буён тўп суриб келаётган эди. У ўтган давр мобайнида ушбу жамоа таркибида жами 60та ўйинда иштирок этиб, ўз ҳисобига 36та гол ёздириб қўйишга эришди.