Павар: "Мен "Марсель" сафига қўшилганимдан фахрланаман"

Франциялик ҳимоячи Бенжамен Павар "Марсель"га ўтиши ҳақидаги ўз ҳис-туйғулари билан ўртоқлашди.

29 ёшли футболчининг трансфер ҳуқуқлари Миланнинг "Интер" жамоасига тегишли бўлиб, улар ҳимоячини 2025/2026 йилги мавсум охиригача ижарага берган, кейинчалик сотиб олиш ҳуқуқи билан.

- Ҳозирда барча фикр-у хаёлларим фақат "Марсель" билан боғлиқ. Мен бу нуфузли клубга қўшилганимдан фахрланаман ва майдонга тушишни интиқлик билан кутмоқдаман, - деди Павар.

2024/2025 йилги мавсумда Павар Италия А Сериясида 23 та ўйинда иштирок этиб, бирорта ҳам гол урмади, аммо битта голли узатмани амалга оширди. Франция терма жамоаси таркибида у Жаҳон чемпиони унвонига эга - ҳимоячи 2018 йилда Россияда бўлиб ўтган мундиалда ғолиб чиқди ва Аргентина билан чорак финалда ўз фаолиятидаги энг муҳим голлардан бирини киритганди.