“Пахтакор” бошқа клубларнинг етакчиларини олиб, кучсизлантирмоқдами? Даврон Файзиевдан мулоҳаза (Видео)

Бир неча кун аввал “Пахтакор” клуби ўз таркибини кучайтириш учун селекция ишларини олиб бораётгани ҳақида хабарлар тарқалди. Унда “шерлар” ўзимизнинг клубларда фаолият юритаётган маҳаллий ва легионерларга эътибор қаратмоқдалиги ёзилган. Жумладан, “Локомотив” ва “Навбаҳор” вакилларига қизиқиш билдираётгани ва уларни бу борада огоҳлантирилганмиш.

Шу ўринда савол туғилади, таркиби айни пайтда энг кучли ҳисобланган “Пахтакор” нега бошқа клубларимизнинг етакчиларини ўз сафига қўшиб олмоқчи? Бундан кўзланган мақсад нима, бошқаларни янада кучсизлантиришми ёки яхши ўйинчиларни текинга қўлга киритиш? Мана шу саволлар билан “SPORTS.uz haftasi” кўрсатувининг эксперти таниқли шарҳловчи Даврон Файзиевга юзландик ва у ўз муносабатини билдирди.

- Биринчидан, мақсад менимча, рақибларни кучсизлантириш эмас. Бусиз ҳам “Пахтакор” мақсадига эриша олади. Шуначаки ўртача савиядаги легионерлар иш бермади. Буни бошида янги раҳбарият келганида қўллаб кўрилди. Лекин ўхшамади. Тўғри, Безерра яхши ўйнади, аммо ҳаммаси ҳам эмас.

“Пахтакор”нинг бу ишини ёмон ҳолат деб ўйламайман. Моддий жиҳатдан кучли клублар бўлсин, ўзимизнинг футболчиларга имконият берсин, маҳаллий ўйинчилар шундай жамоаларда тўп тепиш учун интилсин. Бу ҳам бир бизнес.

Чемпионат савияси тушиб кетмайдими? Германия Бундеслигаси ва Испания Ла Лигаси даражаси тушмаяптику. Уларда ҳам грандлар бошқалардан футболчи олиб, чемпионликни қўлга киритишяпти. Бизда ҳам ҳудди шу ҳолат рўй беряпти. Нега? Чунки клубда маблағ бор. Клуб инфратузилмани яхшилаб қўйди. Пул эвазига ҳамма нарсани муҳайё қилишмоқда. Футбол бу бизнес. Айниқса, клублар учун. Терма жамоа - мамлакат жамоаси. Лекин клубларда пул бўлиши керак. шундагина улар кучаяди.

“Пахтакор”нинг бу иши учун унга қаршилик қилсак, профессионал даражага чиқиб бораётган жамоани йўлини тўсмасдан қолганлар шу савияга интилиши керак. Ҳомийлар керак клубларга. Шунда рақобатчилари таклиф қилган пулга кўнмасдан ўзининг ўйинчисини сақлаб қолиш учун ҳаракат қилса, тўғри бўлади. Нима учун бу оляпти? Чунки унинг пули бор. Бу билан “Пахтакор”ни айблай олмаймиз. Буни чеклайдиган қонун йўқ. Улар ҳаммасини тўғри қиляпти. Гап нариги жамоаларда. Нега етакчисини сотади? Нега шароит қилиб бермайди? Нега амбицияларига мос ўйин кўрсатмайди? деган савол қўйиш керак. “Пахтакор” бошқа клублар учун жавобгарликни бўйнига олиши шарт эмас. Қолаверса, “Пахтакор”да фаолият юритса, рақобат юзага келади, терма жамоага фойдаси тегади. Яъни бу ерда “шерлар” нотўғри иш қилаётгани йўқ. Бошқалар футболчисини қўйиб юборяпти, тўсқинлик қилмаяпти ёки акси бўлса ҳам ўйинчининг ўзи “Пахтакор”га ўта олмагани учун ҳафа бўлиб қолмоқда. “Пахтакор” у клубларни ўйлаши шарт эмас. Рақобатчилари кучсизланиб қолишини уларга қизиғи йўқ. Бу гапларим қўпол туюлар. Лекин ўйлаб қарасангиз пули бор жамоа ўзи учун тўғри ишни амалга оширмоқдалигини кўрасиз.

Назаримда, бошқаларнинг ўзи кучайиши лозим. Раҳбарлар, ҳокимликлар ва ким бўлишидан қатъий назар клубини кучайтиришни ўйлаши даркор ва рақобат бўлсагина бас келиши мумкин. “Бавария”га рақобатчи йўқ. Шунинг учун уларга футболчиларнинг оқимини тўхтата олишмаяпти. Испанияда “Реал”, “Барселона” ва “Атлетико” моддий жиҳатдан анча кучлилиги боис қолганлардан яққол ажралиб қолган. Янги чиққан энг зўр футболчилар “Реал” ёки “Барселона”да ўйнашни орзу қилади. Агар ўша футболчини кетишига тўсқинлик қилингчи, ҳафа бўлади ва клубида аввалгидек ўйнамай қўяди. Футболчи ҳам яхши шароитда ўйнашни хоҳлайди.

Шунга биз ҳам пулинг борми, хориждан футболчи ол дея олмаймиз. Бу ўзининг иши. Ҳудди қўшнингиз пули кўп бўла туриб, малибу харид қилса, унга мерсадес ол демаймизку, – деди Даврон Файзиев.