“Пахтакор”дан ўзиб кетган “Арал”, ўлим гуруҳидаги “Навбаҳор” ва “Насаф”ни кутиб турган синов! Ўзбекистон кубогида нима гаплар? (Барча гуруҳлардаги ҳолат)

Ўзбекистон кубогининг гуруҳ босқичининг биринчи тури ўз якунига етди. Кутилган ва кутилмаган натижалар, пастдагиларнинг “тўполони” ва катта номларнинг эрта “жангга” ташланганига гувоҳ бўлдик. Хўш, биринчи турдан сўнг гуруҳлардаги ҳолат қандай? Сенсация кўрамизми? Қайси жамоа плей-оффда иштирок этишга яқин? Барча гуруҳлар билан танишиб чиқамиз!

"A" гуруҳи.

Эътиборли томони шундаки, Шохруҳ Ишанов бошқарувидаги “Андижон-SGS” плей-офф йўлланмасига эга чиқиш йўлидаги энг муҳим қадамни ташлади. “Жиззах” устидан қозонилган (3:2) ғалаба ОКМК билан бўладиган ўйин натижасидан қатъий назар кейинги босқич имкониятини ўз қўлида сақлаб қолиш имкониятини тақдим этади. “Ғиждувон”да эса молиявий ҳолат ачинарлилигича қолмоқда. Про-лига ўйинларига зўрға келиб-кетаётган клуб 3-турда “Андижон-SGS” билан тўқнаш келади. Катта эҳтимол 3-тур квартетдаги иккинчи ўрин масаласини ҳал қилади. ОКМК эса юз фоизлик натижа билан биринчи поғонани қўлга киритмоқчи эканлигини илк турдаёқ (5:0) исботлаб бўлди.

"B" гуруҳи.

Аввалгисидан фарқли ўлароқ, “B” гуруҳида вазият анчагина чигал. Биринчи турда “Сурхон” “Машъал” билан дуранг ўйнаган бўлса, “Насаф” катта қийинчилик билан “Қўқон-1912” устидан ғалаба қозонди. Иккинчи турда ўйини очилиб бораётган Арслонов жамоаси Қаршида “Насаф” меҳмони бўлади. Суперлига доирасидаги охирги баҳс драматик тарзда кечганини (3:2) ҳисобга олсак, бу ўйиндан камида ўша даражани кутишга ҳақлимиз! Суперлига вакиллари ўзаро тўқнаш келган бир пайтда “Машъал” ва янги мураббий қўл остидаги “Қўқон-1912” клублари плей-офф йўлланмасига эга чиқиш учун сўнгги имкониятини ишга солади. Водийликлар турнирдаги юришини давом эттиришни истаса, муборак клубини таслим этишига тўғри келади. Умуман олганда, бу квартетда ким кейинги босқичга чиқиши 3-турдаги ўйинлардан сўнг ҳал этилса керак.

"C" гуруҳи.

Биринчи турдаги дуранглардан сўнг гуруҳда фаворит ва аутсайдер иборалари ишлатилмаслиги аниқдек туюлди. Ўз тарихида илк бор Про-лигада иштирок этаётган “Юниред” сал бўлмаса, “Металлург”ни енгиб қўйиши мумкин эди. Иброҳим Ибрагимов жамоасини сўнгги дақиқалардан киритган голи билан мағлубиятдан қутқариб қолди. “Нефтчи” ва “Бунёдкор” тўқнашувида жамоалар асосан иккинчи таркиб билан ҳаракат қилгани боис, ишқибозлар ўзи истаган баҳсни томоша қила олмади. 3 та Суперлига клуби иштирок этаётган тўртликда “Юниред”нинг плей-офф йўлланмасига эга чиқиш имконияти биринчи турдан сўнг жуда камайиб кетгандек туюлмоқда. “Нефтчи” ва “Бунёдкор” ҳали-ҳамон плей-офф  учун асосий даъвогар.

"D" гуруҳи.

Бош мураббийсиз қолган “Шўртан” “Янгиер” устидан қозонилган ғалаба эвазига биринчи поғонани банд этиб турибди. Суперлигада жон сақлаб қолиш учун курашиши тахмин қилинаётган “Турон” ва “Бухоро” кейинги босқич учун асосий даъвогар мақомини йўқотгани йўқ. Иккиси ҳам мавсум бошидаёқ мураббийларни алмаштирганини инобатга олсак, Суперлигадаги курашнинг бир қисми гуруҳ пешқадамлиги учун 3-турга қадар давом этишини тахмин қилиш мумкин.

"E" гуруҳи.

Про-лигада пешқадамлик қилаётган “Локомотив” биринчи турда “Зомин”ни кўрмай, (4:0) ўтиб кетиб қолди. “Қизилқум” эса Абрамовнинг “Динамо”сига кичик ҳисобда енгилди. Квартетдаги ягона Суперлига вакили якунда плей-оффсиз қолиб кетиши ҳеч гап эмас. Уларни олдинда Коростиченко бошқарувида савияли футбол намойиш этаётган “Локомотив” билан оғир ўйин кутиб турибди. Агар “темирйўлчилар” ғалаба қозонса, “кончилар” гуруҳ босқичидаёқ Ўзбекистон кубогини тарк этган биринчи Суперлига жамоасига айланиши мумкин.

"F" гуруҳи.

3 та 3 хил, аммо бир хил амбицияга эга жамоалар йиғилган гуруҳдаги вазият анча чигал. Одил Аҳмедов бошқарувидаги “Олимпия” жамоаси илк турда “Навбаҳор”нинг асосий таркиби билан тўқнашувда ўзини ёмон кўрсатгани йўқ, аммо тажриба ўз сўзини айтди. “Андижион” ва “Олимпик” доим ғалаба учун майдонга тушадиганлар сирасига киради. Қисқаси, бу гуруҳда 3 Суперлига клуби сўнгги сонияларга қадар плей-офф йўлланмаси учун жанг қилади.

"H" гуруҳи.

“Пахтакор-79” жуда оғир ўйинда “Шаҳрихончи” устидан муҳим ғалабани қўлга киритди ва кейинги босқич учун имкониятларини яхшилади. “Хоразм” эса “Локомотив-БФК”ни кичик ҳисобда енгиб, плей-офф учун дадил қадам ташлади. Бир қарашда барчаси оддий кўринган гуруҳ якунда чинакам сенсация тақдим этиши мумкин. Воқеалар ривожини кузатишда давом этамиз.

"J" гуруҳи.

Кутилганидек, “Арал” мусобақани яхши бошлади. “Дўстлик" Тошкентни йирик 4:1 натижасида таслим этган қорақалпоғистонликлар турнир жадвалида (киритилган голлар сони бўйича) “Пахтакор”дан олдинда турибди. Бошковичнинг “Сўғдиёна”си эса иккинчи турда бу тафовутни йўқ қилишга уриниб кўради. Максим Шацких шогирдлари жуда хотиржам ва дадил қадамлар билан кубок ўйинларини бошлаб олди. Айнан улар биринчи ўрин учун асосий даъвогар. Кейинги турда эса плей-оффнинг иккинчи йўлланмаси учун жанг Зоминда бўлиб ўтади.

Я . У