"Пахтакор"га гол урган футболчи: Ҳисобда олдинда бориб, имкониятни бой берганимиз аламли бўлди

Жорий мавсумда "Насаф" сафига келиб қўшилган Шокир Йўлдошев иккита расмий учрашувда иштирок этиб, дебют голини уришга ҳам эришди. "Аждарлар" матбуот хизмати Шокир Йўлдошев билан жамоага қўшилиб кетиши ва мақсадлари ҳақида интервью уюштирди.   

"Янги мавсум аввалида, жамоа машғулотларига келиб қўшилдим ва бир нечта назорат учрашувларида майдонга тушдим. Ўз ўйиним билан мураббийимиз Рўзиқул Бердиевнинг эътиборига тушдим ва якунда жамоа аъзосига айландим.

Иккита расмий учрашувда ҳам айнан битта рақибга қарши майдонга чиқдик. Бу ўйинлар бир биридан бутунлай фарқ қилди. Рақиб юртимиздаги энг номдор жамоалардан бири эди. Тўғри, бундай жамоага гол уриш футболчини руҳлантиради. Аммо ҳисобда олдинда бориб, имкониятни бой берганимиз аламли бўлди. Футбол мавсуми энди бошланди, кейинги беллашувларда кўпроқ гол уриб, жамоамиз ғалабасига ўз ҳиссамни қўшмоқчиман. “Насаф” билан совринли ўринларни қўлга киритишни истайман", -деди фуболчи.