БААнинг Дубай шаҳрида 2018 йилги Суперлигага тайёрланаётган "Пахтакор" клуби йиғиннинг 7-кунида "Над Ал Шеба" спорт мажмуасида машғулот ўтказди. Бу ҳақда клуб матбуот хизмати маълум қилмоқда. 

Бир кун олдин "Ал-Ҳамрия"га қарши беллашувда 90 дақиқа ўйнаган футболчилар спорт залида Ласло Ямбор билан машғулот ўтказишди. Улар тикланишга қаратилган машқларни бажаришди. Қолган ўйинчилар ва дарвозабонлар эса майдонда шуғулланишди. Одатдагидек енгил машқлар билан қизишиб олгач, футболчилар турли тактик кўрсатмалар устида ишлашди.

Кичик ҳудудда тўпни бир-бирига аниқ етказиб бериш, босим уюштириш, тезкор ҳужум ташкил этиш ва уни зарба билан якунлаш сингари жиҳатларда меҳнат қилинди. Машғулот якунида футболчилар узоқ масофаларга тўп ошириш борасида маҳоратини сайқаллаштирди.

Енгил жароҳати сабабли бир неча кун алоҳида шуғулланган Марко Симич умумий гуруҳга қайтди.

"Пахтакор" БААдаги учинчи назорат ўйинини 23 февраль куни Уммоннинг "Шабаб" жамоасига қарши Ал-Айнда ўтказади. Учрашув Тошкент вақти билан 18:00да бошланади.