Пенальти тепишни Роналдудан ўрганинг

“Ан-Наср” футболчилари Саудия Арабистони чемпионатининг саккизинчи турида рақиб майдонида “Неом” билан тўқнаш келди ва ўйинни 3:1 ҳисобида ўз фойдасига ҳал қилди.

Риёдликларнинг голларига Анжело, Криштиану Роналду ва Жоау Феликс муаллифлик қилди. Мезбонларнинг ягона жавоб тўпини Аҳмад Абду киритди.

65-дақиқада Криштиану Рональду пенальтидан унумли фойдаланди. Бу португалиялик юлдузнинг фаолиятида 11 метрлик нуқтадан урган 180-голи бўлди. Умумий ҳисобда Роналду жами 215 марта пенальтини ижро этган ва шулардан 35 тасида гол уролмаган.

Бу гал 40 ёшли ҳужумчи рақиб дарвозабонини ожиз қолдирди ва фаолияти давомидаги  расмий учрашувларда урган голлари сонини 953 тага етказиб олди.

Маълумки, Роналду жаҳон футболида энг кўп тўп киритган футболчи ҳисобланади. Унинг ҳар бир голи янги рекорд сифатида қайд этилаверади.