Питер Хюистра: "Ғалаба қозониб имкониятимизни яхшилаб олишни хоҳлаймиз"

Эртага Осиё Чемпионлар лигаси доирасида иккинчи тур баҳслари ўтказилади. “Пахтакор” бу сафар Ироқнинг “Эйр Форс”га қарши майдонга тушади.

Ушбу учрашувдан аввал “Пахтакор” бош мураббийи Питер Хюистра ҳамда ҳимоячи Анзур Исмоилов матбуот анжуманида қатнашишди.

Хюистра: - “Эйр Форс” билан беллашувга яхши ҳозирлик кўряпмиз. Ўйин қизиқарли бўлади, деб ўйлайман. Рақибимиз яхши жамоа, юқори савиядаги футболчилари бор. “Шаржа”га қарши улар жуда яхши таассурот қолдиришди. Кейинги босқичга чиқиш учун эртанги баҳсдаги ғалаба имкониятимизни яхшилайди.

Икки йил олдин “Эйр Форс” билан плей-офф босқичида ўйнагандик. Бу жамоа сафида баъзи ўзгаришлар бўлган. Жамоада қолган футболчилари ҳам бор. Ўшанда бир учрашувдан иборат тўқнашув эди. Бор кучни ўша ўйинга ташлаш мумкин эди. Ҳозир эса бошқача ҳолат. Гуруҳда жами олти беллашув ўйналади.

Захирадан туширилган футболчиларнинг фойдали ўйнагани жуда яхши. Бизда баҳсни ўзгартириш учун имконият бўлиши қувонарли. Тошкентдаги салқинроқ ҳаводан кейин бу ерда иссиқ ҳавода футбол ўйнаяпмиз. Бундай шароитда бешта алмаштириш имкониятига эга бўлиш ёқимли. Қайси футболчилар бошланғич таркибда тушишини кейинроқ ҳал қиламан.

Исмоилов: - Биз ўйинга жиддий ҳозирлик кўрмоқдамиз. Эртага ўзимиз хоҳлагандек ҳужумкор футбол кўрсатиб, ғалабага эришишни истаймиз. Рақиб кучли, уларни ҳурмат қиламиз. Аммо йигитлар билан ютуқ орқали имкониятимизни яхшилаб, мухлисларни хурсанд қилишга уринамиз.

Мусобақада кўплаб ўйинлар ўтказганман. Навбатдаги ўйинлар учун жамоавий бирдам бўлиб, машғулотларда тер тўкишда давом этиб, жипслашган ҳолда ҳаракат қилишимиз керак. Ўзимизга ишониб, бир-биримизни қўллаб қувватлашимиз зарур.