Про лигадаги клубга нима бўляпти? Мотивацияси йўқолди. Етакчилари чемпионат тугамасидан кетиб қолишди. Бош мураббий қандай изоҳ берди?

Про лига вакили – “Янгиер” клубининг жорий мавсумидаги иштирокини кузатган мухлис борки, ўзига яраша таассуротларга эга бўлиши муқаррар.

Клуб кучли бешталикка кириш учун астойдил курашди. Бироқ якунда асосий рақобатчиси “Хоразм”га енгилиб, қуйи бешликка равона бўлди. Лекин жамоа мавсум давомида ўзидан яхши таассурот қолдирган пайтлари ҳам бўлди. Айниқса, бош мураббийликка Диёр Мирзабоев келганидан кейин унинг бошчилигидаги жамоада мағлубиятсиз сериялар кузатилди.

Лекин кейинчалик “Янгиер”да муаммолар кузатила бошланди. Натижада мағлубиятли ўйинларга гувоҳ бўляпмиз. Эшитишимизга қараганда, клубда муаммолар етарли ва айрим етакчилар чемпионат тугашини кутмасдан жамоани тарк этишга улгуришган. Бу ҳақида “Янгиер” бош мураббийи Диёр Мирзабоев Sports.uz мухбирига қуйидагиларни айтди:

- Клубда менгача, аниқроғи мавсум аввалида про лига йўлланмаси учун кураша оладиган таркиб йиғилган, - дея гап бошлади, бош мураббий. - Афсуски, бошида ўхшамаган, кейин мураббий ўзгаргач, жамоани мен қабул қилиб олганман. Ҳамма жойда шунақа бўлади: янги мураббий келса, ҳамма футболчи ҳам ўзини кўрсатгиси келади. Бизгача ишлаган инсонларни муҳокама қилмоқчи эмасман. Биз қўлимиздан келганича ҳаракат қилдик. Клубга келгач, ишга бошқача ёндашдик. Футболчиларда руҳий томондан ишонч уйғота олдик. Кўрган бўлсангиз, ёмон бошламадик. Мен келган маҳалда молиявий томондан ҳам ёрдамлар кўрсатилди. Вилоят ҳокимияти, ҳомийлар жим қараб турмадилар. Ютган ўйинларимиздан кейин мукофот пуллари ва ойлик маошлар вақтида берилиб турди. Натижалар ҳам кўтарилди, адашмасам 5-ўрингача кўтарилдик. “Янгиер” хусусий жамоа. Маҳмуд Орзиқулович клуб таъсисчиси ҳисобланади. Бу йил тўртинчи мавсум. Жамоада олдин ўйнаган ўйинчилар ҳам айтишадики, сира иш ҳақлари қолиб кетмаган, ҳаммаси билан ҳисоб-китоб қилиб келинган. Бу йил про лигада жиддий вазифа қўйилгани учунми футболчиларнинг ойлик маошлари яхши даражада бўлган. Кейинчалик молиявий масалада қийинчиликлар кўзга ташлангач, иккинчи даврада раҳбарият таклиф киритиб, ёшлар билан ҳам ишлаб, ўзимизни синаб кўришимизни айтдилар. Тажрибали ўйинчилар билан келишилган ҳолатда хайрлашдик. Барибир битта одамга клубни бошқариш қийин, буни тушуниб турибмиз. Футбол шунақада, кимдир ютади, кимдир ютқазади. “Янгиер” номи, тарихи бўлгани билан ҳозир етакчи клублар билан рақобатлаша олмаймиз. Клуб раҳбари ҳар қандай ҳолатда ҳам жамоани қўллаб-қувватлашга ҳаракат қилиб келмоқда. Яратилган шароитлар бўйича ҳали муаммо бўлгани йўқ. Фақат ойлик маошлардан узилиш бор холос.

Ёзда қўшилганлардан Муҳаммад Исаев билан дўстона хайрлашганмиз. Ислом Баротов ҳам жамоамизни тарк этди. Булардан ташқари, Шохруҳ Холматов, Нодир Йўлдошев, Саид Абдужабборов, Элёр Мамасолиев ҳам “Янгиер”ни тарк этишган. Албатта, асосий таркиб аъзоларининг кетиши мураббий сифатида мени хавотирга солди. Энди ёшларга кўпроқ имконият беряпмиз. Кучли бешталикка кира олмаганимиздан сўнг жамоада мотивация йўқолди. Бундай пайтда айбдор мураббий. Вазифани бажара олмади. Раҳбариятга айтганман, бешталикка кира олмасак қандай қарор қабул қилсанглар ҳам розиман, кетиш керак бўлса кетаман деганман. Аммо раҳбарият охиригача ишимни давом эттиришимни айтишган. U-19 жамоамиз чемпионатда зўр қатнашди. Ўша таркибдан бир қатор футболчиларни асосий жамоага олдик ва ўйинларда имконият беряпмиз. Улар дебют қилишяпти, гол уришяпти. Бундан хурсанд бўляпман. Алмаштириб бўлмайдиган футболчи ва мураббийнинг ўзи йўқ. Ҳар биримиз алмашишимиз мумкин. Ҳамма нарсани тўғри қабул қилдик. “Ғиждувон”га қарши учрашувда юқоридаги ёшлардан бештаси ўйнади. Олдимизда “Шўртан” ва “Арал Самали” билан ўйинларимиз турибди. Бу учрашувларда ғалабалар қозониб, мавсумни яхши кайфиятда якунлаш ниятимиз бор.

Аввало, “Янгиер” раҳбариятига менга ишониб таклиф қилишгани учун раҳмат. Мураббий бор имкониятини ишга солиб, натижа кўрсатгиси келади. Раҳбарият билан муносабатим яхши. Аммо ҳозирча келаси йилга ҳеч қанақа режалар тузилгани йўқ. Мураббийга нима керак? Биринчи навбатда ишлаш учун шароит бўлиши лозим. Албатта, келаси йилга ҳам клубда қолиб ишлаш ва бу йилги хатолар тасодиф бўлганини янги мавсумда исботлаш ниятим бор, - дея фикр билдирди, Мирзабоев.

Шуҳратбек Жўраев.