Пролига-2026 регламенти эълон қилинди ва клубларни ўрганиш ишлари бошланди

Лига аввалроқ “Суперлига регламенти”ни тақдим этганди. Эндиликда “Пролига регламенти” лойиҳаси ишчи вариантда сайтга юкланди.

Эртага 28 ноябрь куни Биринчи лига мусобақасининг 2025 йилги мавсуми ўз якунига етади. Тошкент мезбонлик қилаётган плей-офф босқичининг финал ўйинида Замин ҳамда БухДУ жамоалари ўзаро майдонга тушади. Бухоро давлат университети жамоаси ўтган мавсум ҳам Биринчи лигада иштирок этган бўлиб, мавсумни ўз минтақасида 5-ўринда якунлаганди. Жорий мавсумда жамоа ўсишга эришиб, Ғарбий минтақада учликка кирди ва плей-оффда финалга қадар етиб келди. Ўзагини тўлиқ янгилаган Замин ўтган мавсум чорак финалда ФарДУ билан тўқнаш келиб, имкониятни бой берганди. Бу йил эса Марказий минтақада ғолибликни қўлга киритди ва ҳал қилувчи финал ўйинига қадар етиб келди.

“Биринчи лига регламенти”нинг 5.10-бандига кўра, мавсум якунига кўра Пролига йўлланмаси қайси жамоага тақдим этилиши, ҳамда Биринчи лигадан қайси жамоа чиқиб кетиши масаласи Лига томонидан аниқланиши белгиланган. Яъни, Суперлига ва Пролига мусобақалари ўртасида спорт принциплари бирламчи бўлса, Пролига иштирокчиларини аниқлаб олишда Лига жамоаларнинг мусобақага қай даражада тайёр эканлигини мониторинг қилиши муҳим аҳамиятга эга.

Шундан келиб чиқиб, Лига қарор қабул қилишда мавсум давомида жамоаларнинг мусобақалардаги иштироки, ҳужжатларни юритиш ишлари, бухгалтерия ҳисоботлари, майдонлар ва улардаги ўзгаришлар, лицензиялаш талабларига қай даражада мос тушиши каби ҳолатлар хулосасига таянади.

Пролигада иштирок этиш истагида бўлган жамоа “Пролига регламенти” орқали унинг талабларини ўрганиб чиқиши мумкин. Айни вақтда Лига бир қатор жамоалар билан ўрганиш ишларини олиб бормоқда. Пролига талабларига жавоб бериши шартида, улар кейинги иштирокини мазкур мусобақада давом эттириши мумкин бўлади.

Бу ҳақда ЎзПФЛ хабар берди.