ПСЖ бош мураббийлигига кутилмаган номзод пайдо бўлди

ПСЖ бош мураббийи Кристофер Гальте жамоани тарк этиши мумкин. Парижликлар унинг қўл остида кутилган натижага эриша олмади ва мутахассиснинг келажаги сўроқ остида турибди. 

Франция клуби кейинги мавсум учун янги мураббий изламоқда. Мазкур лавозимга жамоанинг собиқ футболчиси Тьяго Мотта ҳам даъвогар, дея хабар бермоқда "La Gazzeta Dello Sport" нашри. 40 ёшли мутахассис айни дам "Болонья"га устозлик қилмоқда.

Манбанинг таъкидлашича, Мотта Италияда қолишни истайди, лекин ПСЖдан келган таклифни рад қилмайди.

Маълумот учун, Тьяго 2018-2019 йиллар оралиғида парижликларнинг 19 ёшлилар жамоасида ишлаган. Шунингдек, у фаолияти давомида "Жерона", "Специя" клубларининг бош мураббийи бўлган.