ПСЖ марказида фожиа: Витинья, Дро ва Заир-Эмери қаерда эди?

​Франция чемпионати етакчиси ПСЖ ўз майдонида “Монако”га қарши кечган баҳсда кутилмаганда 1:3 ҳисобида имкониятни бой берди. Ўйин таҳлили шуни кўрсатмоқдаки, мағлубиятнинг бош сабаби жамоа ярим ҳимоя чизиғининг бутунлай “ўчиб қолгани” бўлди.

​Луис Энрике бу ўйинда асосий етакчилари Фабиан Руис ва Жоао Невеш хизматидан фойдалана олмади. Уларнинг ўрнини тўлдириши кутилган Витинья, Дро Фернандес ва Уоррен Заир-Эмери учлиги эса мухлислар кутган ўйиннинг ўндан бирини ҳам кўрсата олмади.

Учрашувдаги энг ачинарли жиҳатлардан бири — парижликларнинг эркатой истеъдоди Заир-Эмерининг хатоси бўлди. Одатда, ҳимоянинг ўнг қанотида ишончли ўйнайдиган ёш юлдуз, бу сафар марказда ўзини йўқотиб қўйди. 27-дақиқада айнан унинг тўпни олиб чиқишдаги болаларча хатоси “Монако”га ҳисобни очиш имконини берди.

“Барселона”дан катта умидлар билан олиб келинган ёш Дро эса майдонда деярли кўринмади. Жисмoний курашларда рақибга бутунлай ютқазди, бирорта ҳам яккакурашда  ғолиб чиқмади.

Жамоанинг “мияси” ҳисобланган Витинья бу ўйинда ўзига ўхшамади. Ноаниқ паслар ва пала-партиш ҳаракатлар унинг ўйинига соя солди.

​Учрашувдан сўнг Луис Энрике жамоасининг ўйинидан норози эканини яширмади:

​- Биз жуда кўп хато қилдик. Бундай пала-партиш ўйин бизнинг услубимиз эмас. Олдинда бизни “Челси”га қарши Чемпионлар лигасидаги баҳс кутмоқда, бунақа ўйин билан у ерга бориб бўлмайди, - деди испаниялик бош мураббий.

ПСЖ марказдаги бўшлиқни зудлик билан ёпмаса, келаётган чоршанба куни “Челси” билан бўладиган Чемпионлар лигасининг 1/8 финалидаги биринчи учрашувнинг ўзиёқ парижликлар учун ҳақиқий “даҳшат”га айланиши ҳеч гап эмас.