ПСЖ мухлислари "Барселона" футболчиларини ухлатмади

Бугун ПСЖ УЕФА Чемпионлар лигаси 1/8 финал жавоб баҳси доирасида ўз майдонида “Барселона”ни қабул қилади.

Таъкидлаш лозимки, Каталония пойтахтидаги биринчи ўйиндан олдин "Барса" мухлислари ПСЖ футболчилари яшайдиган меҳмонхонанинг деразалари олдига тўпланишиб, турли қўшиқлар куйлаб, барабанлар чалиб, мушакбозликлар қилиб футболчиларни тун бўйи дам олишларига тўсқинлик қилишган эди.

Парижлик мухлислар ҳам худди шу “меҳмондўстлик”ни такрорлашди. Улар меҳмон жамоа футболчилари яшайдиган меҳмонхона олдида тонгги соат 4 да жуда катта мушакбозлик уюштиришди.

Француз журналисти Робин Барнер ушбу ҳаракат ҳақиқатан ҳам Париж клуби мухлислари томонидан уюштирилганлигини тасдиқлади.

Эслатиб ўтамиз, ПСЖ – “Барселона” ўйини бугун Тошкент вақти билан соат 01:00 да бошланади. Ушбу жамоаларнинг “Камп Ноу”даги дастлабки баҳси 1:4 ҳисобида парижликларнинг ғалабаси билан якунланган.