ПСЖ Неймар ва Верратти билан хайрлашмоқда

“Пари Сен-Жермен” раҳбарияти жамоанинг тажрибали ўйинчилари Марко Верратти ва Неймар хизматидан воз кечишга қарор қилди. Ёзги трансферлар вақтида ҳар икки футболчи боқа жамоага ўтадиган бўлса, клуб уларнинг кетишига тўсқинлик қилмайди.

Марко Верраттига “Ал-Ҳилол” қизиқиш билдиряпти. Саудияликлар италиялик ярим ҳимоячини трансфер қилиб, кейин унинг ёрдамида Лионель Мессини “Ал-Ҳилол”га келишга кўндиришни режалаштирган.

Неймар илгари Париждан кетиш вариантларини йўққа чиқараётган эди. Бироқ фанатлар уйига бориб норозилик намойиш ўтказганидан кейин бразилиялик юлдузнинг фикри ўзгарди.

31 ёшли ҳужумчини Англия Премьер-лигаси вакиллари ўз сафига чорлаяпти. Трансфер бўйича экспертлар Неймарнинг маоши Англиядан бошқа лигалар жамоалари учун оғирлик қилишини таъкидламоқда.