ПСЖнинг чемпионлигини нишонлаш вақтида икки киши ҳаётдан кўз юмди

ПСЖ Чемпионлар Лигасида ғалабасини нишонлаш вақтида Францияда икки киши ҳалок бўлди. Бу ҳақда кўплаб расмий маҳаллий манбалар хабар беришди.

Финалда "Париж Сеинт-Гермен" "Интер"ни йирик 5:0 ҳисобида мағлуб этиб, ўз тарихида илк бор Чемпионлар Лигаси ғолибига айланди.

Le Parisien нашри RTL'га таяниб хабар беришича, Парижда ўйиндан кейин юзага келган тартибсизликлар чоғида ёш аёл скутерда кетаётган пайтда автомобиль уриб юборган, натижада у ҳалок бўлган.

Шунингдек, Франциянинг жануби-ғарбидаги Дакс шаҳрида 17 ёшли ўсмирнинг ўлими ҳақида ҳам хабар берилган. RMC Sport манбасига кўра, у фан-зона яқинида кўкрагидан пичоқ билан яраланган ва шифохонада олган жароҳатларидан вафот этган.