"Қандайдир рағбат бўлса, хурсанд бўламиз", "кимни қандай эътибор билан қараши ўзига ҳавола", "биз Эрондан қўрқмаймиз" - Акбар Усмонов билан эксклюзив интервью

Хабарингиз бор, айни вақтда Қувайтда футзал бўйича Осиё Кубоги бўлиб ўтмоқда. Мазкур турнирнинг "B" гуруҳидан ўрин олган Ўзбекистон терма жамоаси Туркманистон, Тожикистон ҳамда Баҳрайн каби терма жамоалар билан бир гуруҳдан жой олган. Илк турда вакилларимиз Туркманистон дарвозасига жавобсиз 8 та гол урди. 

Терма жамоамизнинг етакчиларидан бири ҳисобланмиш Акбар Усмоновдан бир мухлисларни ва ўзимизни қизиқтирган бир қатор саволларга жавоб олдик: 

- Ассалому алайкум. Авваламбор, ғалаба билан табриклайман. Ўйин ҳақида фикрларингиз? 

- Ассалому алайкум. Ғалаба билан барча юртдошларимизни муборакбод этаман. Туркманистон жамоаси бугун ўзи ўйлагани каби ўйнай олмади. Албатта, бунинг сабабчиси биз. Эрта прессинг ва тезкор голлар ўйинни ҳал қилди деб ўйлайман.

- Бурчак зарбаларидан берилган узатмалар ва рақиб хатоси орқали кўп гол урдик. Булар ўйланганми ёки ўзингиз ҳам рақиб бунақа хатоларга йўл қўйишини кутмаганмидингиз?

- Биз ҳар бир учрашув учун стратегия тузиб чиқиб, шу стратегия асосида майдонда ҳаракат қиламиз. Мураббийларимиз кўрсатмаларини тўғри амалга оширдик ва тезкор голлар урдик. Якунда баҳс бизнинг фойдамизга ҳал бўлди.

- Баҳрайн ва Тожикистоннинг кучига қандай баҳо берасиз. Уларга қарши ўйинларда ҳам хотиржам тарзда ғалаба қозона оламизми?

- Хотиржамликка берилиб, рақибга беҳурматлик қилиш яхши оқибатларга олиб келмайди. Йўлимиздан чиққан ҳар қандай рақиб билан охирги сонияга қадар боримизни бериб жанг қиламиз.

- Сўнгги Жаҳон чемпионатида термамиз ажойиб иштирок этганди. Эрон билан ўйинда 8-9 ҳисоби қайд этилган. Анча олдин ўзимизда бўлииб ўтган Осиё Кубогида ҳам Эронга 2:1 ҳисобида мағлуб бўлганмиз. Бу орадаги фарқ қисқараётганидан далолат. Ҳозир фарқ яна ҳам қисқарган деб ўйлайсизми?

- Тан оламан Эрон терма жамоаси нафақат Осиёда, балки, Жаҳонда ҳам ўз ўрнига эга ҳисобланади. Охирги йилларда даражалар анча яқин келиб қолди. Биз Эрондан қўрқмаймиз. Мағлуб бўлган пайтларимиз ҳам ўйин томонлама ютқазмаганмиз. Одатда, қайсидир деталларда хатога йўл қўярдик. Яна улар билан тўқнаш келишимизни ҳаммамиз интизорлик билан кутяпмиз.

- Футзалга эътибор кам лекин натижа бор. Футболда эса бунинг акси. Бу ҳолат ғашингизга тегмайдими?

- Нима бўлишидан қатъи назар, ҳаммамиз бир юрт фарзандларимиз. Биз ватан қўриқчиларимиз. Футзалда эканлигимдан нолимайман. Кимни қандай эътибор билан қараши ўзига ҳавола. Биз ватанимиз учун боримизни беришга тайёр йигитлармиз.

- Дилшод Раҳматов "Дангал" лойиҳаси меҳмони бўлган пайти ойлик маошларни пастлигини айтганди. Терма жамоа даражасидаги футзалчи фақатгина футзални ўзи билан шуғуллланиб, тирикчилигини қила оладими? Умуман ҳар қандай турнирда муносиб иштирок этаётган футзал жамоамизни моддий томондан қанчалик рағбатлантира олишяпти?

- Сиз ҳақсиз. Футзалда ойлик маошни айрим жамоалар 3-4 ойлаб кутади. Мукофот пулларини гапирмаса ҳам бўлади. Фақатгина гранд жамоаларда маош ва мукофот пуллари қолган клубларга нисбатан кўпроқ. Терма аъзолари ҳам одатда икки гранд жамоага бўлинишининг сабаби ҳам шунда деб ўйлайман. Сабаби, уларнинг молиявий талабларини фақатгина 2-3 та жамоа кўтара олади. Аслида, ватанимиз олдидаги бурчни адо қилмоқдамиз. Агар қандайдир рағбат бўлса, хурсанд бўламиз. Бўлмаса ҳам хафа бўлмаймиз. Футзалчилар ватан учун доим борини бериб келган. 

- Топ футзалчиларимизни кўпчилиги ўзимизнинг клубларда ҳаракат қилади. Хорижий лигаларда ўйнашга нима тўсиқ бўлади?

- Футзалда агент муаммо ҳисобланади. Ҳар йили бизга бошқа лигалардан таклифлар келади. Агенти йўқ йигитларни ўзи гаплаша олмайди ёки улар айтаётган пул тўғри келмайди. Хуллас, шу каби омиллар туфайли уйда қолганим яхши деб, ўзимизда ўйнашда давом этишади.