Қаршидан бўлган клуб Про лигада иштирок этади

Про лиганинг янги мавсумида Қарши давлат университети қошидаги "Лочин" клуби иштирок этади. Бу ҳақда лиганинг расмий саҳифаси хабар берди.

Маълум қилинишича, ўтган йилнинг 9 декабрь куни Лига ишчи гуруҳи Қарши шаҳрида бўлиб, Қарши давлат университети ҳудудида барпо этилаётган стадионда ўрганиш ишларини олиб борган.

7 апрель куни эса Қарши давлат университети ва Лига ўртасида меморандум имзоланган бўлиб, "Лочин" клуби унда белгиланган йўналиш асосида фаолият юритган ва дебют мавсумидаёқ футбол жамоатчилиги эътиборини ўзига жалб этган. Шу давр мобайнида "Лочин" Про лигада иштирок этиш учун талабгор клуб сифатида барча зарур ҳужжатларни расмийлаштирди.

Энг сўнгги босқичда университет ректори Дилмурод Набиев "Лочин" клубининг 2026 йилдан эътиборан  лигада иштирок этишини кафолатловчи расмий хатни Лигага тақдим этди. Университет жамоаси томонидан Лига қўйган талаблар босқичма-босқич бажариб келингани инобатга олиниб, "Лочин" Про лига иштирокчилари сафига қабул қилинди.

Шу тариқа, Pro лигада университетлар қошидаги клублар сони иккитага етди. Эслатиб ўтамиз, ўтган мавсум Фарғона давлат университети жамоаси мусобақада муносиб иштирок этган эди. Университет ректори Баходиржон Шермуҳаммадов жорий мавсумда ҳам FARDU клуби Про лигада тўп суришини тасдиқлади", — дейилади хабарда.