Қатар юлдузлар лигасида мавсум якунланди. Хави бошчилигидаги

Қатар юлдузлар лигасининг 2020 йилги мавсум ўз ниҳоясига етди. “Ал-Дуҳаил” чемпион бўлди ва Осиё Чемпионлар лигасининг янги мавсумида тўғридан-тўғри гуруҳ босқичида иштирок этиш ҳуқуқини қўлга киритди. Ҳамюртимиз Сардор Рашидов тўп сураётган “Қатар СК” эса мавсумни 8-ўринда якунлади.

Шунингдек, иккинчи бўлган "Ал-Райян" ҳам гуруҳ босқичига чиқди. Аммо кучли учликдан жой олган "Ал-Садд"нинг ОЧЛдаги тақдири номаълум бўлиб турибди. Хави жамоаси ОЧЛни гуруҳ босқичидан бошлайдими ёки плей-оффданми, буни 21 ноябрь куни бўладиган Амир кубогидан сўнг билиб оламиз.

Агар ушбу кубокни ярим финалга қадар этиб борган “Ал-Араби” ёки “Мархия”дан бири қўлга киритса, у ҳолда "Ал-Садд" "Чемпионлар Лигаси-2021"ни плей-офф босқичидан бошлайди. Агар кубокни "Ал-Садд" ёки "Ал-Дуҳайл"нинг ўзи ютса, чемпионатда 4-ўринни эгаллаган "Ал-Гарафа" Чемпионлар лигаси плей-оффида қатнашади.

Биз учун яна бир аҳамиятли томони шундаки, Қатарнинг плей-оффда иштирок этадиган жамоаси бу босқичда Ироқ ва Ўзбекистон клублари ғолибига қарши ўйнайди.

Матнда хатолик топсангиз, ўша хатони белгилаб, бизга жўнатинг (Ctrl + Enter)