Қатарни ютиб келган Ўзбекистон нега бу гал енгилди? Катанец қандай мураббий ўзи?

Ўзбекистон миллий терма жамоаси Осиё Кубогидаги юришини тўхтатди. Чорак финалда Қатар билан баҳсда пенальтилар сериясида имкониятни бой берди. Ваҳоланки, дастлаб ўз дарвозамиздан тўп олиб чиққач кейин мувозанатни тиклаган эдик. Аммо гол урганимиздан сўнг темпни ошириб яна олдинга ўтиш ўрнига ҳимояга қайтдик. Бунинг сабаби ҳозирча номаълум!

Ҳозирча деганим беъжиз эмас. Таҳминимиз бўйича мураббийнинг тактикасига кўра жамоа эҳтиёткорликка асосланиб ортга чекинди, деб ўйлаган эдик. Бироқ матбуот анжуманида жаноб Катанецдан нега голдан сўнг ҳимояланишни айтдингиз дея мурожаат қилинганда, у мен ундай кўрсатма бермадим. Бу футболчиларнинг ўзига боғлиқ. Ўша пайт руҳий ҳолат шуни талаб қилгандир, дея жавоб берди.

Қизиқ томони, Австралия билан ўйинда Жалолиддин Машарипов ҳисобни тенглаштиргач шерикларини олдинга чорлаганди. Бироқ Сречко Катанец аксинча улар ортга қайтишларини кўрсатди.

Ўйиндан сўнг Одил Ҳамробеков айтган гаплари кўпчиликни эсанкиратиб қўйди. Унинг айтишича, машғулотларда жамоа пенальтиларга тайёргарлик кўрмаган экан. Катанец шогирдларини учрашув давомида ютишни режа қилган кўринади. Лекин беллашув давомида ютишни истаган мураббий вақти вақти билан ҳужумчиларни майдонга тушириши керак. Бошқалар учун қандай билмадимку, лекин мен учун ҳужумчи майдонга тушиб қандайдир вазифани бажариши эмас, балки гол уриши шарт. Қолгани бекор. Қолганини бошқа позиция вакиллари бажара олади.

Сречко Катанецнинг ҳужумчисиз ўйнаш тактикаси бир нечта ҳулосаларни берди. Биринчиси (энг асосийси): Ҳужумни Шомуродовдан бошқасига ишонмаслик. Иккинчиси, ўз билганидан қолмаслик. Доим ўзи ишонган футболчиларни асосий таркибга қўявериш. Учинчиси, таваккал қилишдан қўрқиш ва керагидан ортиқ ҳавотир. Гол урган вазиятда кайфият яхшилигида майдонга тушишга тайёр турган Бобир Абдихолиқовни икки марта қайтариб юборишни қандай тушиниш мумкинлигини Бобирдан сўрасак, яхшироқ жавоб берар балки.

Турнир давомида терма жамоани танқид қилмасликка, мусобақада футболчилар босимда қолмаслиги учун тийилдик. Лекин энди ҳаммасини тарозига қўядиган пайт бўлгани учун айримлари ҳақида гапирмоқдамиз.

Аслини олганда, биз Ҳиндистон ва Таиланддан бошқа жамоани ютмадик. Австралияга тарихий гол урдик холос…

Кўп ҳолларда вингерларимиз қанотдан юриш қилиб, жарима майдонига тўпни узатишга келганда буни амалга ошира олмади. Чунки аксарият ҳолларда жарима майдони ичида тўпни қабул қиладиган ҳужумчимиз йўқ эди. Тўғри, бош билан голлар урдик. Лекин футболдаги асосий қуроллардан бири саналган қанотдан узатмалардан воз кечишга мажбур бўлдик.

Айримлар айтиши мумкин, Шаҳбоз Умаров майдонга тушиб, йўқолиб қолди, деб. Лекин бунга мураббий айбдор. Нега? Сабаби Ҳиндистон билан беллашувда голлар уриб олганимиздан сўнг ҳужумчиларни майдонга тушириб, уларга ўйин амалиёти ва мусобақа тафтини ҳис қилишга имкон берилмади. Агарда Қатар билан учрашувда Бобир ҳам тушиб Умаровдаги каби зарба билан гол ура олмаганида мураббий ўзининг ҳақлигини айтган бўларди. Аслида қийин баҳсларда ўйин амалиётига эга бўлмаган футболчидан бирданига гол кутиб бўлмаслигини ҳамма яхши билади.

Бир сўз билан айтганда, ҳужумчисиз ўйнаш айрим жамоалар билан учрашувда иш бериши мумкин. Кучлиларга қарши баҳсларда бунинг акси.

Гапирса гап кўп. Қолганини кўрсатувлар мобайнида кўпроқ таҳлил қилишга ҳаракат қиламиз. Ҳали бу ҳақда кўп ва ҳўп гаплашамиз. Унгача эса Осиё кубогида Иордания каби биз ҳам ярим финалда ўйнашимиз мумкин эди, деган ҳаёл билан учрашувларни кузатамиз.

Ҳа айтганча, матбуот анжуманларининг бирида Катанец биз Бразилия ёки бошқа кучли терма жамоа эмаслигимизни, футбол жамоатчилиги пастга тушиши кераклигини айтганди. Шу ўринда мураббийга эслатма: биз шу пайтгача Таиланддан қўрқиб ўйнамаганмиз (мағлубиятларимиз доим ўртоқлик ўйинларида бўлган), Қатарни ютиб келганмиз, жаҳон чемпионати саралашида ҳам, ўз уйидаги Осиё кубоги очилиш ўйинида ҳам. Буни ҳеч ким билмаса ҳам қатарликлар яхши билади.

Бекзод ИСАЕВ