Қай бирини танлайсан! "Реал" ва "Ливерпуль" ёш иқтидорни талашяпти

«Реал Сосьедад» тарбиялаган ёш иқтидорга катта клублар кўз тикяпти. Европанинг бир қатор етакчи жамоалари «Реал Сосьедад» таркибида тўп суриб келаётган 20 ёшли марказий ҳимоячи Хон Мартин билан жиддий қизиқмоқда. 

Fussball-News нашрининг ёзишича, футболчига Мадриднинг «Реал» клуби, шунингдек «Ливерпуль», «Челси» ва «Арсенал» даъво қилмоқда.

Манбага кўра, ушбу тўрт клуб қишки трансфер ойнаси очилиши арафасида ёш ҳимоячининг ўйинларини яқиндан кузатмоқда. Айнан шу даврда улар «Реал Сосьедад»га расмий таклиф билан чиқиши мумкин.

Хабарда таъкидланишича, Сан-Себастьян клуби ўз сардорларидан бирига айлана оладиган бу футболчини арзонга қўйиб юбориш ниятида эмас. «Реал Сосьедад» раҳбарияти Хон Мартин бўйича музокараларга фақат 50 миллион евро ва ундан юқори таклифлар келиб тушган тақдирдагина тайёр экани айтилмоқда.

Хон Мартин бутун профессионал фаолиятини «Реал Сосьедад»да ўтказиб келмоқда. Жорий мавсумда у клуб сафида етти ўйинда майдонга тушди. Ҳимоячи ҳозирча гол ёки голли узатмалар билан ажралиб турмаган бўлса-да, мутахассислар унинг ўйиндаги барқарорлиги ва тактик етуклигини алоҳида қайд этмоқда.