"Қизилқум" клуби матбуот котиби бу йил жамоасидан нималар кутмоқда?

Хабарингиз бор, 27 февралдан Ўзбекистон Суперлигаси-2020 старт олди. Жамоалар чемпионатга юртимизда ва имконияти борлар хорижда тайёргарлик кўришди.

Мураббий ва футболчиларнинг фикрларини йил бўйи ўқиб, кузатиб боришимиз мумкин. Аммо ўша жамоада фаолият юритаётган матбуот котибларини сиз деярли тингламагансиз. Шу боис биз янги мавсум аввалидан матбуот котибларининг фикрларини билиш учун уларга 3 та савол билан мурожаат қилдик.

1. Жамоанинг тайёргарлик жараёни (қаерларда йиғинлар ташкил этилгани ва ўртоқлик ўйинлари) ҳақида

2. Янги мавсумдан нималар кутмоқдасиз?

3. Клуб олдига қандай вазифа қўйилди?

Азиз Нурий ("Қизилқум")

1. Жамоа мавсумга юқори даражада тайёргарлик кўрди. Йиғинлар Навоий ва Тошкетда, шунингдек ҳал қилувчи сўнгги босқич Туркиянинг Анталия шаҳрида давом эттирилди. Жамоа Навоийдаги йиғин давомида "Машъал" ва "Бухоро" жамоалари билан, Тошкентдаги йиғин доирасида "Бунёдкор", "Пахтакор", "Сўғдиёна", "Локомотив-БФК" жамоалари билан назорат учрашувларида майдонга тушди. Хориж йиғинида учта назорат учрашуви ташкил этилди. Унда футболчиларимиз икки ғалаба ва бир дуранг қайд этишди.

2. Янги мавсумдан ҳамма ўз жамоасидан қандайдир янгиликларни, яхши натижаларни кутади. Шу сабаб стадионлар тўлиб тошиши, жамоамиз кўпроқ ғалаба қозониб, мухлисларини хурсанд этишини кутмоқдаман.

3. Клуб бу йил яхши трансферларни амалга оширди. Имкон борича юқорироқ натижани қўлга киритиш мақсадида ҳаракат қилади.