"Қизилқум"да футболчи алмаштиришни Нестеров ҳал қиладими? Бош мураббий бу саволга жавоб берди

Бугун Суперлиганинг 4-туридан ўрин олган “Локомотив” – “Қизилқум” (1:1) баҳси бўлиб ўтди. Ўйиндан сўнг ўтказилган матбуот анжуманининг биринчи қисмида меҳмонлар устози Ҳамид Актамов иштирок этди ва ўзининг ўйин ҳақидаги фикрларини билдириб ўтди.

-Ўзингиз гувоҳ бўлдингиз, бугун жуда ҳам жанговар ва қизиқарли ўйин бўлди. Гарчи биринчи бўлиб тўп киритган бўлсакда, якунда ғалабани сақлаб қололмадик. Йўл қўйилган кичик хатолар туфайли гол ўтказиб юбордик.

“Локомотив” жорий мавсум ҳали ўз майдонида ғалаба қозонмаган эди ва шу сабабли, улар жонини бериб ўйнади. Биз ҳам ўз навбатида, ушбу ўйинга пухта тайёргарлик кўриб келган эдик. Аммо бугунги ўйинда озроқ ҳужум чизиғида яхши ўйин кўрсата олмадик. Ўйлайманки, ҳали ҳаммаси олдинда ва жамоамизнинг ўйини очилиб кетади.

-Жамоада Игнатий Нестеровнинг ўрни қандай? Бугунги ўйинда иккала ўзгаришни ҳам айнан унинг кўрсатмаларидан сўнг амалга оширдингиз.

-Ушбу вазиятда Игнатий Нестеровнинг ҳеч қандай дахли йўқ. Ўйинчи алмаштириш ўзимизнинг режамизда бор эди. Ушбу футболчилар бироз толиқиб қолгани боис захирага олишга мажбур бўлдим. Қолаверса, ҳисоб тенглашганидан сўнг, “Локомотив”нинг ҳужумларини бартараф этиш мақсадида ҳимояга бўйдор футболчиларни тушурдим.