Қизиқ, Рашидов нега яна жамоасиз қолди? Ёхуд уни хорижликлар кузатяпти...ми?

Ёзги танаффус ҳам тугаб, яна чемпионат ўйинлари бошланиб кетди. Трансфер ойнаси 4 июлдан 30 июлга қадар очиқ турди. Бу вақт давомида ўзбек жамоалари ўзларига керакли бўлган футболчиларни қўлга киритишга ҳаракат қилдилар. Бу вақтда ўйинчиларнинг ўзларида ҳам режалар бўлиб, клубини ўзгартириш пайида бўлишади. Албатта, ҳаммаси вазиятга қараб. Бундай пайтда қайси клубнинг қандай трансфер амалга оширгани эътиборимизда туради. Шунингдек, бўш юрган футболчиларни ҳам қайси клубда пайдо бўлишини кузатиш қизиқ.

Йил бошида бир қатор яхши савиядаги ўйинчилар жамоасиз қолгани бизни бироз ҳайрон қолдирганди. Бироқ иккинчи давра арафасида уларнинг бир нечтаси ўз клубига эга бўлишди. Масалан, таянч ярим ҳимоячиси Владимир Козак жамоасиз қолган футболчилардан бири эди. Чемпионатни бирор-бир клубда бошлаш учун унда имкониятлар бор эди. Бироқ қандайдир сабабларга кўра иш ўхшамади. Охир-оқибат Козак биринчи даврани майдон ташқарисида ўтказиб юборди. Иккинчи давра арафасида унга таклифлар яна бўлди. Уларнинг орасида “Навбаҳор”нинг варианти Козак учун ҳар томонлама қулайи эди. Шу сабабли наманганлик футболчи Бабаян жамоасига ўтиб қўя қолди. У бундан зўрини ҳам топа олмасди!

Акбар Исматуллаев ҳам клубсиз қолиб кетган ўйинчилардан бири эди. Ҳимоячи “Металлург”ни тарк этгач, ҳеч қаерда кўриниш бергани йўқ. Лекин иккинчи давра олдидан у ҳам ўз жамоасига эга бўлди. Тошкентнинг “Бунёдкор” клуби Исматуллаевга шартнома таклиф қилди. Бундай таклиф Акбар учун айни муддао эди. Ёки бўлмаса ҳужумчи Иван Нагаевни олайлик. У ҳам ўтган йили “Металлург” шарафини ҳимоя қилди. Жорий чемпионатнинг дастлабки қисмида дам олишига тўғри келди. Чунки ўзига маъқул келадиган вариантлар топилмади, чоғи. Бироқ иккинчи давра олдидан Нагаев собиқ жамоаси – “Локомотив”га қайтди. “Темирйўлчилар” Иваннинг имкониятларидан яна бир бор фойдаланиб кўришни лозим топдилар. Шундай қилиб, юқорида санаб ўтган футболчилар ярим мавсумлик “хордиқ”дан сўнг яна катта футболга қайтишди. Лекин ҳаммаси ҳам эмас.

Яна сизу, бизга яхши таниш бўлган ижрочилар бор эди. Бу борада гап кетганда биринчи навбатда Санжар Рашидовни тилга олиб ўтмасак бўлмайди. Ўтган ойда 31 ёшни қарши олган ярим ҳимоячининг охирги жамоаси Тошкентнинг “Бунёдкор”и бўлди. Рашидов фаолиятининг катта қисмини ўзи туғилиб ўсган Жиззахнинг “Сўғдиёна” жамоасида ўтказди. Орада ярим мавсум “Насаф” учун ҳам ўйнаб қайтган. 2021 йилги мавсумда “Бунёдкор” шарафини ҳимоя қилгач, ушбу чемпионатни бошқа клуб сафида бошлаши кутилганди. Бу борада Санжарни ўз сафида кўришни хоҳлаган клублар ҳам бор эди. Аммо футболчи биринчи даврада бироз хордиқ чиқаришни лозим топган ҳолда ўз устида ишлашда давом этди. Ёзги трансфер вақтида унинг бирор-бир клуб билан келишувга эришиши кутилганди ва воқеалар ривожи шунга қараб кетаётганди ҳам. Уни ёзги йиғин чоғида “Металлург” жамоасининг машғулотида учратгандик. Натижада Санжар ниҳоят ўз жамоасига эга бўлибди-да, деган ҳаёлга бордик. Лекин трансфер ойнаси ёпилган маҳалда “Металлург”нинг янги ўйинчилар рўйхати эълон қилинганида Санжар Рашидовга кўзимиз тушмади.

Кейин билсак, “Металлург” билан шартнома имзоланмаган ва шу тариқа футболчи яна жамоасиз қолиб кетди. Бироқ ҳозир бу ҳақида аниқ айтишга шошилмай турганимиз маъқул. Гарчи ўзбек клублари орасида унга жой топилмаган бўлса-да, хориж клублари билан музокаралар олиб борилаётгани борасида хабарлар йўқ эмас. Аниқроғи, Рашидовни легионер сифатида кўрсак бундан ажабланмаймиз. Биласиз, унинг акаси Санжар Рашидов Қатарда “Умм Салал” таркибида тўп суряпти. Укаси Саҳоб Рашидов эса ҳозирда Самарқандда “Динамо” шарафини ҳимоя қилмоқда. Санжар Рашидовни ҳали футболда айтадиган сўзи бор. Шунинг учун у таслим бўлмасдан янги жамоасида имкониятини максимал даражада кўрсатиш иштиёқида. Унинг янги клуби хориждан бўлиши ҳақиқатга яқинроқ.