"Қўрқув бор эди, лекин..." - "Қўқон-1912"ни Суперлигага қайтарган Баҳром Ҳайдаров яна нималарни айтди?

Ниҳоят, “Қўқо-1912” клуби плей-оффдаги уринишидан кейин Суперлига йўлланмасини қўлга киритишга муваффақ бўлди. “Металлург”га қарши учрашувнинг асосий вақти 1:1 ҳисоби билан якунланди. Пенальтилар сериясида омад қўқонликларг кулиб боқди. Ўйиндан кейин жамоа бош мураббийи Баҳром Ҳайдаров саволларга жавоб қайтарди.

- Биринчи навбатда раҳбариятни, ишқибозларни, қўл остимизда ишлаб, меҳнат қилган ҳаммани ғалаба билан табриклайман. Бу бир кишини меҳнати эмас. Раҳбариятдан тортиб, ошпазимизгача барчани қилган меҳнатларини алоҳида эътироф этаман. Кўпчилик “Қўқон-1912” жамоасини Суперлигага чиқишини хоҳлаганди. Барчамиз биргаликда ушбу вазифани уддалаганимиздан хурсандман. Ўйинга келсак, тенг учрашув бўлди. Қайси бири Суперлига ва қайси бири про лига клуби, сезилмади, деб ўйлайман. Иккала жамоа ҳам жон-жаҳди билан ўйнади. Тўғри, рақиб сифатлироқ жамоа. Аммо биз кўпроқ хоҳладик шекилли, Худо бизга берди. Ютқазаётганимизда ҳам футболчилар тушкунликка тушишмади. Йигитларимизни ҳақиқий меҳнати бўлди. Майдонда тўп сурганлар жон-жаҳди билан ғалаба учун курашишди.

- Иккала плей-оффда ҳам про лига клублари ғалаба қозонди. Бу дегани про лигани даражаси анча ўсдими ёки Суперлиганики тушиб кетганми?

- Бу йилги форматда про лигада кучли бўлди, деб ўйлайман. Ўткинчи учрашувлар бўлмади. Ҳар бир беллашув, охирги ўриндаги билан пешқадам ўйнамасин, барча баҳс жуда қийин кечди. Бу эса ҳар бир жамоани тонусда ушлаб турди. “Шўртан”ни ҳам Суперлигага чиққани билан табриклайман. Плей-оффни биринчи ўйинини биринчи таймини кўргандик. Унчалик катта  фарқ кўринмади. Менимча, “Шўртан” иккинчи бўлимда “Олимпик”га нисбатан яхшироқ ўйнади, шекилли. Бизни ҳам фарқимиз билинмади. Про лиганинг савияси ошган, деб ўйлайман.

- Жамоа 120 дақиқа ўйнади. Гўёки чарчамагандек. Бу нима билан боғлиқ?

- Ҳар бир футболчини ўз устида ишлаши, биз мураббийлар ҳаммасини ўрганиб чиқиб, уларни жисмоний ҳолатини максимал даражада ушлаб туришга ҳаракат қилдик. Бугунги учрашув кўрсатдики, биз уддалай олдик. Албатта, 120 дақиқа етадими-йўқми, деган қўрқув бор эди. Лекин барча йигитларга раҳмат, чидашди. Демак, тўғри йўлдамиз.

- Пенальтилар сериясида жамоа дастлабки иккитасидан фойдалана олмади. Ўша пайтларда нималарни ўйладингиз?

- Ҳар бир мураббий ўз жамоасига ишониши керак. Ортда бораётганимизда ҳам яна имконият борлиги, рақиб ҳам гол ура олмаслиги мумкин, деган нарса хаёлим ўтди. Барибир уддалашимиз мумкин, дея ўйлаб тургандим. Худога шукр, дарвозабонимизга катта раҳмат. Фойда келтирди.