"Раҳбарият томонидан 5-6 йиллик лойиҳа ишлаб чиқилган" - Зайниддин Тожиев биринчи лига жамоаси билан нимани кўзлаяпти?

Ўзбекистон Кубогининг илк турига старт берилди. “F” гуруҳидан ўрин олган “Қўқон-1912” ва “Замин” жамоалари ўртасидаги учрашувда 1:1 ҳисоби қайд этилди.

Биринчи лига вакили ҳисобланган “Замин” Суперлига жамоасининг майдонидан бир очко билан қайтгани албатта эътиборга молик ҳолат.

Учрашувдан сўнг “Замин” бош мураббийи Зайниддин Тожиев фикрлари билан ўртоқлашди.

- Жуда қийин ўйин бўлди. Жамоамизни кўрдинглар, ёш йигитлардан иборат. Биз учун катта тажриба. Авваламбор, ўйинчиларни келажакда Суперлигада бемалол ўйнашини ўзлари ҳис қилишади ва бундан кейинги учрашувларда ҳам рақобатбардош жамоа бўла оладилар, деб ўйлайман.

- Бу йил жамоа биринчи лигада иштирок этмоқда. “Зомин” “Замин”га, Тошкент жамоасига айланди. Клубнинг вазифаси қандай?

- Бу хусусий жамоа. Раҳбарият томонидан 5-6 йиллик лойиҳа ишлаб чиқилган. Энг катта эътибор ёш, иқтидорли болаларни тарбиялаб, катта футболга чиқариш.

- Ўтган сафар “Олимпик”ни “Локомотив” билан ўйинини кўрганимизда иккинчи бўлимда чарчаб қолди. Сабаби сифатида сунъий майдонда ўйнаб туриб, табиий майдонга ўтгани билан изоҳланди. Биламиз, “Замин” ҳам асосан сунъий майдонда шуғулланади. Қўқонга қарши ўйинда эса жамоангиз 70-дақиқадан сўнг “очилди”. “Қўқон-1912”га нисбатан жисмоний ҳолати кучлироқ кўринди...

- Шунақа дейсизу, барибир жамоамиз иккинчи рақамда ўйнади. Бундай ҳолатда ўйнаганингизда кўп куч йўқотасиз. Захирадан тушган футболчилар ўйинни кучайтириб беришди. Болалар катта куч йўқотишди, борини бериб ҳаракат қилишди. Сунъий майдонга келсак, 100 фоиз йигитларни оёғи “ўтириб” қолади. Сунъийдан табиий майдонга ўтганда барибир билинади.

- Дарвозабон ҳақида нима дейсиз? Биринчи вазиятда қўпол хато ва гол. Кейинги вазиятларда эса “Супермен”га айланиб кетди...

- Эрта-индин дарвозабонлар мураббийи ҳам келяпти. Дарвозабонимиз ёш, 2007 йилда туғилган. Иқтидори катта. Мураббий келиб у билан ишласа, бундй хатолар қилмайди. Меҳнаткаш бола, ҳамма хато қилади. Хатодан кейин тушунликка тушиб, яна 2-3 та гол ўтказиб юборса ҳам бўларди. Лекин тушкунликка тушмасдан ўзида куч топиб, нечта вазиятда қутқарди? Лазиз 2009 йил асосий таркибда ўйнаяпти, Ҳожибек 2008 йил, у ҳам асосий таркибда. Ёшларга ўйнаш учун имконият яратиб беряпмиз, ишонч билдиряпмиз. Улар мана шундай қийин ўйинларда тажриба орттириб, ривожланади ва Суперлигага чиқишга тайёр бўладилар.