Рақиб рекорд ўрнатди, “Барса” уялиб қолди

Испания чемпионатининг 11-турида амалдаги чемпион “Барселона” ўз майдонида “Эльче” футболчиларини қабул қилиб, ўйинда 3:1 ҳисобида муваффақият қозонди.

Бироқ бу учрашув “Эльче” номини тарихга муҳрлади. Гап шундаки, “Эльче” Испания чемпионатлари тарихида “Барселона”га қарши учрашувда тўпни рақибга нисбатан кўпроқ назорат қилган дебютант жамоа сифатида рекорд ўрнатди.

Opta Sport статистика портали маълумотига кўра, “Эльче” учрашув вақтининг 51 фоизи давомида тўпга эгалик қилган. Каталонияликларда бу кўрсаткич 49 фоизни ташкил қилди.

“Барселона” тарихида Ла Лиганинг янги иштирокчисига қарши бундай ҳолат илк бор қайд этилди (Бу кўрсаткич бўйича маълумотлар 2005-2006 йилги  мавсумдан буён тўпланмоқда).

Тур якунларига кўра, “Барселона” 11 ўйиндан кейин 25 очко билан Ла Лигада иккинчи ўринни эгаллади. “Эльче” эса 14 очко билан тўққизинчи поғонада бормоқда.