Расман! АПЛнинг навбатдаги тур ўйинлари қиролича вафоти сабаб қолдирилди (фото)

АПЛ расмий сайти бу ҳафта бўлиб ўтиши режалаштирилган тур ўйинлари қолдирилишини маълум қилди. Берилган хабарда шундай дейилади:

- Бугун эрталаб бўлиб ўтган йиғилишда Премер-лига клублари Қиролича Елизавета II га ҳурмат бажо келтиришди.

Унинг ғайриоддий ҳаёти ва халққа қўшган ҳиссасини шарафлаш ва ҳурмат белгиси сифатида ушбу ҳафта охири АПЛ ўйинлари, шу жумладан, душанба оқшомидаги ўйин ҳам қолдирилади.

Ричард Мастерс, Премьер-лига ижрочи директори шундай деди: “Биз ва клубларимиз олий ҳазратларининг мамлакатимиз олдидаги узоқ ва тинимсиз хизматига ҳурмат бажо келтирмоқчимиз.

Бизнинг энг узоқ вақт хизмат қилган монархимиз сифатида у илҳом манбаи бўлди ва фидойи ҳаётдан кейин ажойиб мерос қолдирди.

Бу нафақат халқ учун, балки бутун дунё бўйлаб уни ҳайратда қолдирган миллионлаб одамлар учун жуда қайғули вақт ва биз унинг ўлимига мотам тутаётганлар билан биргамиз".

Мотам давридаги АПЛ ўйинларига оид қўшимча маълумотлар кейинчалик батафсил эълон қилинади.