Расман! "Эл-класико"ни бошқарадиган ҳакам ўзгарди. У Испания Суперкубогида Мессига қизил кўрсатган

Эртага Испания Ла Лигасининг 30-туридан ўрин олган "Реал" ҳамда "Барселона" жамоалари учрашувини бошқарадиган ҳакам ўзгарди. Бу ҳақда ташкилот расмий сайти хабар бермоқда.

Дастлаб, ўйин учун тайинланган Матеу Лаос кутилмаганда мушакларидан жароҳат олган. Унинг қачон соғайиши маълум қилинмаяпти.

Энди Лаоснинг ўрнига "эл-класико"ни испаниялик бошқа бир машҳур ҳакам - Хесус Хиль Мансано бошқариб боради. Айтиш лозимки, 37 ёшли рефери жорий йилнинг январь ойида Испания Суперкубоги баҳсида "Барселона" ҳужумчиси Лионель Мессига қизил карточка кўрсатган эди.

Эътиборлиси, бу аргентиналик футболчи учун каталонияликлар сафидаги илк қизил карточка бўлди.

“Реал” – “Барселона” ўйини 10 апрель куни Тошкент вақти билан соат 00:00 да бошланади.