Расман! "Интер" германиялик футболчи билан шартномани узайтирди

Миланнинг “Интер” клуби матбуот хизмати ўзининг расмий сайтида германиялик марказий ҳимоячи Янн Биссек билан шартнома узайтирилганини эълон қилди. Унга кўра, футболчининг "нерадзуррилар" билан янги шартномаси 2029 йилнинг 30 июнига қадар амал қилади.

Маълумот учун, 23 ёшли футболчи "Интер" сафига 2023 йилнинг ёзида Даниянинг "Орхус" жамоасидан келиб қўшилган эди. Жорий мавсумда Биссека миланликлар сафида жами 11 та ўйин ўтказди.

Қайд этиш лозимки, Янн Биссек Германия ёшлар терма жамоаси сафида 8 та ўйин ўтказган. Трансфермаркт интернет порталига кўра унинг айни дамдаги трансфер нархи 25 миллион еврони ташкил қилади.

"Интер" ортда қолган 12 тур натижаларига кўра 25 очко жамғариб, А Серия турнир жадвалида 4- ўринда бормоқда. Мусобақа пешқадами "Наполи" ҳисобида эса 26 очко бор.