Расман! "Ювентус" Европа чемпионини таркибга қўшиб олди

"Сассуоло" клуби ва Италия терма жамоаси ярим ҳимоячиси Мануэль Локателли "Ювентус"га кўчиб ўтди. Бу ҳақда клуб расмий сайти хабар тарқатмоқда.

Юқоридаги манбага кўра, "кекса синьора" 23 ёшли италиялик футболчини кейинчалик 35 миллион евро эвазига сотиб олиш шарти билан 2 йилга ижарага олган.

Локателли "Сассуоло" сафида 2018 йилдан буён тўп суриб келаётган эди. Ўтган давр мобайнида у жами 99 та ўйинда иштирок этди ва ўз ҳисобига 7 та гол ҳамда 11 та голли узатма ёздириб қўйди.

У бундан аввал "Аталанта" ва "Милан" клубларида ўйнаган. Локателли шу ёз Италия терма жамоаси сафида Европа чемпионлигини қўлга киритди.