Равшан Ҳайдаров: "Рақибни ўрганиб чиқдик ва ўйлашимча, бугун режаларимиз иш берди" (матбуот анжуманидаги фикрлар)

20 ёшгача бўлган футболчилар ўртасидаги Осиё Кубоги чорак финалидан ўрин олган Ўзбекистон - Австралия учрашувида 1:1 ҳисоби қайд этилди. Пенальтилар сериясида эса омад вакилларимизга кулиб боқди - 5:4. Беллашувдан кейин ташкил этилган матбуот анжуманида вакилларимиз бош мураббийи Равшан Ҳайдаров иштирок этиб, қуйидаги фикрларни билдириб ўтди:

"Авваломбор, бизни орзиқиб кутган мухлисларга, ҳалқимизга раҳмат айтаман. Жаҳон чемпионатига чиққанимиз билан ҳаммани табриклайман! Футболчилар ҳам катта меҳнат қилишди. Уларнинг охиригача курашгани, ўйинга жиддий муносабатда бўлгани учун миннатдорчилигимни изҳор этаман. 

Ўйинга келсак, биз рақибга қарши яхши тайёргарлик кўрдик. Уларни ўрганиб чиқдик ва ўйлашимча, режаларимиз иш берди. Йигитлар гол ўтказиб юборганига қарамасдан ўзида куч топиб, ирода кўрсатгани алоҳида эътирофга муносиб.

Кейинги босқичда рақиб танлашимиз хато бўлади, деб ўйлайман. Бу плей-оффда ҳамма ўзига яраша кучли. Биз жаҳон чемпионатига чиқдик, тўғри. Лекин ҳали вазифамиз тўлиқ бажарилгани йўқ. 

2015 йилда ҳам термамизни мундиалга олиб чиққандим. Ўша йили йигитлар ўз тоифасида энг кучлилари бўлган. Ҳозир ҳам футболчиларим ўз чизиғида энг зўрлари. Улар буни исботлаб келишмоқда. Ўша йилги ва ҳозирги футболчиларни солиштирмаган бўлардим. 2015 йилги таркибдаги йигитларни айни пайтдаги жамоамизга ўрнак сифатида кўрсатиб келганман. Буни таркибдаги ҳамма яхши билади.

Австралияга қарши майдонда муаммолар яратдик. Йигитлар режа асосида ўйин намойиш этди. Тўғри, бунинг учун кўп куч сарфладик. Аммо шундай бўлиши аниқ эди. Сабаби, рақиб ўта жиддий эди. Мантиқан олиб қараганда, биз ғалабага лойиқ эдик, деб ҳисоблайман. 

Ўйинга киришиб кетиш масаласи ҳам бор футболчиларда. Захирадан чиққан ўйинчилар ўйинга кўникиб кетиши ҳам керак. Пўлатхўжа майдонда катта кўламдаги вазифани бажарди. У ғалаба учун қўлдан келганини қилди. Чарчаб қолган футболчиларни кўришим билан уларни ўйиндан олдим. Менимча, захирадан ўйинга қўшилган йигитлар ҳам яхши ҳаракат қилди. 

Биз кейинги босқичдаги рақибдан бир кун кўпроқ дам оламиз. Аммо 120 дақиқа ўйнаганимиз барибир сезилади. Шунга қарамай, эътиборни бошқа нарсаларга қаратишни маъқул кўраман. Масалан, тикланиш масаласи бизни кутиб турибди. 

Бу ёшда руҳан тайёр бўлмаса, уларга қийин бўлиши табиий. Руҳият биз учун муҳим. Бу борада психологлар билан ҳам иш олиб борамиз. Таркибдаги йигитлар ҳар томонлама кучли бўлиши керак. Шунингдек, ички муҳитни ҳам бир ҳилда ушлаб туришимиз керак. Майдонда 11 киши ўйнайди. Бироқ қолганлар ҳам шерикларини қўллаб-қувватлаши лозим. Бугун биз шундай ҳаракат қилдик ва мақсадимизга эришдик", - деди мутахассис.