«RB Zaltsburg»ga qo‘yib yuborishmagani, «Paxtakor»ga o‘tib xato qilgani va futbolimiz muammolari haqida Akram Komilov bilan intervyu

SPORTS.uz AGMK klubi himoyachisi Akramjon Komilov bilan intervyu uyushtirdi. Ushbu suhbatda, himoyachi ko‘pchilikni qiziqtirgan savollarga javob berib o‘tdi.

- «Paxtakor»ga o‘tishingiz xato qaror bo‘ldi, deb hisoblaysizmi?

- Afsuski shunday. Menda bir nechta yaxshi takliflar bor edi. Ispaniyaning birinchi ligasi vakilidan va hatto, EChLda ishtirok etadigan «Midtyulland»dan ham taklif bor edi. Bu orada Shota Arveladze oila a’zolarim bilan uchrashdi. Ularni ko‘ndirdi. O‘zim Evropaga ketishni afzal ko‘rgan bo‘lsam ham, Toshkentda qoldim. Bu ota-onamning tanlovi edi. O‘tgan ikki yil ichida ikki bor jarohat oldim. Bor yo‘g‘i 18 o‘yin o‘tkazdim xolos. «Paxtakor»dagi ilk mavsumda to‘liq harakat qilishim kerak edi. Afsuski, unday bo‘lib chiqmadi. Meni Shota Arveladze asosan kuchsizroq raqiblarga qarshi o‘yinlarda maydonga tashladi. Kuchliroq klublarga qarshi bahslarda zaxirada o‘tirdim. Aynan shuning o‘zi psixologik sinib qolishimga xizmat qildi. Keyinroq jarohat oldim. Qarabsizki, keraksiz futbolchiga aylandim. Ikki yil ichida hatto 8 kg ortiqcha vazn yig‘ib yubordim. Boz ustiga, maydonga qaytib o‘zimni tiklab olishimga ko‘p vaqt talab etildi.

Murabbiylar mendan sovuqqonroq to‘p surishimni so‘rashadi, ammo bunday qila olmayman. Men «Paxtakor» bilan shartnoma imzolaganimdan bir kun o‘tib, Daniya klubidan taklif kelib tushdi. Afsuski, poezd ketib bo‘lgan edi. Bilasizmi, bizda futbolchilar 16-23 yoshga qadar top darajada bo‘ladi. Keyin tramplin yo‘qligi uchun boshqa o‘smaydi. Yoshlar o‘rtasidagi o‘yinlarda Osiyo chempion bo‘lganmiz. JChlarda birorta terma jamoadan klass borasida ortda qolmaganmiz. Futbolchilar professional darajaga ko‘tarilgach, ichki chempionatimiz saviyasida qotib qoladi. Legionerga aylanish uchun ko‘pincha to‘sqinlik qilinadi. Shaxsan menga «RB Zaltsburg» taklif bilan chiqqan. Avstriyaga uchib borganman va ikki o‘yinda ishtirok etganman. Ular meni olib qolishmoqchi bo‘lgan. Hatto, klubimga 100 ming dollar taklif qilgan. O‘ylashimcha, biznikilar katta summa so‘ragan shekilli ular fikridan qaytdi. Bunday holatlar juda ko‘p bo‘ladi.

Bilasizmi, nega Janubiy Koreya va Yaponiya terma jamoasi bizni bemalol engadi? Ular hal qiluvchi o‘yinlarga kamida 12-20 legioner bilan keladi. Biz birigina Eldor Shomurodov bilan JCh yo‘llanmasini qo‘lga kiritishimiz juda qiyin. Men «RB Zaltsburg»da ko‘rikda bo‘lgan chog‘im, ikki nafar qatarlik yosh futbolchi bilan tanishdim. Ularning aytishicha, Qatar futbol rahbarlari atayin yoshlarni tajriba to‘plash maqsadida bepul Evropaga qo‘yib yuborar ekan. Bizda ham shu ishni yo‘lga qo‘yish kerak. Aks xolda, legionerlar soni kamayib ketaveradi. Sezgan bo‘lsangiz, bizda bir necha yil ilgari xorijda to‘p suruvchi futbolchilar ko‘p edi. Hozir asosan ichki birinchilik vakillaridan tuzilgan jamoa vaziyatni hal etishi kerak.

- «Paxtakor»dan AGMKga o‘tishingiz nega bunchalar cho‘zilib ketdi? Transfer tafsilotlari bilan o‘rtoqlashsangiz?

- Mavsum yakunlangach, Mirjalol Qosimov menga qo‘ng‘iroq qildi. Unga kerak ekanligim haqida aytdi. O‘yin amaliyotisiz qolib ketganim uchun ketmoqchi ekanligimni Piter Xyuistraga aytdim. U meni qolishga undadi, lekin yana avvalgi terma jamoa darajasiga chiqishim uchun ketishga qaror qildim. Menda «Lokomotiv» klubidan taklif bor edi, ammo moliyaviy jihatdan qulayroq bo‘lgani uchun Olmaliqqa yo‘l oldim. Aslida, «Bunyodkor»dan ham takliflar bor edi. Shunchaki, moliyaviy ahvoli og‘ir bo‘lgani uchun qaytishni istamadim. O‘tgan mavsumda «qaldirg‘ochlar» a’zolari 5 oylab maosh olgani yo‘q. Oilali futbolchilar uchun bu chinakam muammo tug‘diradi.

- O‘zbekistonlik 80 foiz yosh futbolchilar professional futbolda yo‘q. Bunga sabab nima?

- O‘smirlar hamda yoshlar terma jamoamizning darajasi Evropaning shu yoshdagi futbolchilarning darajasi bilan deyarli bir xil holatda bo‘ladi. Misol uchun, biz o‘smirlar safida jahon chempionatlarida Xorvatiya va boshqa kuchli terma jamoalar bilan o‘ynaganmiz va ular bilan oramizda katta farqni sezmaganman. Shunchaki, bizning futbolda iste’dodli futbolchilar uchun o‘sishga sharoitlar yo‘q. Bunday talantli o‘yinchilar O‘zbekiston chempionatida o‘ynab, kuchsiz jamoalarni yutib yuraveradi, ammo o‘sish bo‘lmaydi va o‘sha darajada qolib ketaveradi. O‘sish bo‘lishi uchun esa xorij klublariga o‘tish kerak.

- Bizning o‘sha iqtidorli futbolchilarimizni ko‘pchiligi xorij klublaridan qiziqish bo‘lishiga qaramay, mahalliy klublarimiz safida qolib ketmoqda. Bunga sabab nimada?

- Bizning eng katta xatolarimizdan biri aynan shu hisoblanadi. Qaysidir yosh iste’dodga qiziqish bo‘lsa, jamoalarimiz uning narxini baland qilib belgilab qo‘yadi. Shunday so‘ng, o‘sha futbolchilarimizning xorij klubiga o‘tish imkoniyati pasayib ketadi. Misol uchun, qaysidir xorij jamoasi bizning futbolchilarga taklif bilan chiqsa va 100 ming dollar taklif qilsa, uni sotish kerak. Ular bizning yosh iqtidorlarimizning o‘yinini ko‘rib, o‘zbek futbolchilariga qiziqishni kuchaytiradi va yana etishib chiqayotgan iste’dodlarni o‘z safiga qo‘shib olishga urinadi. Klublarimiz avvaliga o‘z o‘yinchisini 100 ming dollarga sotgan bo‘lsa, bu safar 200 ming yoki 300 ming va xatto 500 ming dollarga ham sotishi mumkin.

Shunday qilib, mazkur miqdorni millionga ham olib chiqsa bo‘ladi. Faqat, sabr kerak. O‘zingiz o‘ylab ko‘ring, Osiyoning kuchli klublari Yaponiya, Koreya, Avstraliya kabi gigantlar safida Evropaning kuchli chempionatlarida o‘ynovchi ko‘plab katta nomlar bor. Bizda esa faqat Eldor va yana bir nechta asosan Osiyo jamoalarida o‘ynovchi yigitlar bor xolos. Saralashning so‘nggi bosqichida 4-5 ta kuchli klub yig‘ilib qolgan taqdirda, albatta, biz jahon chempionatiga chiqa olmaymiz. Buni muxlislar tushunmaydi. Faqatgina, futbolning ichida yurgan odamgina buni tushunishi mumkin. Shunday ekan, har doim futbolchilarimizni ayblashni noto‘g‘ri deb o‘ylayman.