“Реал” бу футболчи учун ўз ўйинчисидан воз кечишга тайёр

“Реал” клуби раҳбарияти ёзги трансферлар вақтида ҳимоя марказини кучайтиришга ҳаракат қилади.

Зинедин Зидан бу ўринга “Севилья”да ишончли ўйин намойиш этаётган ҳамюрти Жюль Кундени олиб келишни сўраяпти.

“Реал” мураббийлар штаби агар Кунде келадиган бўлса, 22 ёшли футболчининг ўйин амалиётини кафолатлаш учун бразилиялик ҳимоячи Эдер Милитаони асосий таркибдан чиқариб ташлашга ҳам тайёр.  

“Севилья” қатор грандлар нишонида турган футболчини 60 миллион евродан камига қўйиб юбормайди. 2019 йилдан бери “Севилья” шарафини ҳимоя қилиб келаётган футболчининг клуб билан шартномаси 2024 йилнинг ярмигача амал қилади.

Кунде жорий мавсумда 41 та учрашувда майдонга тушиб, ҳимояни мустаҳкамлашдан ташқари, тўртта гол уришга ҳам муваффақ бўлди.